Ministri i Brendshëm, Bledi Çuçi shprehu sot kënaqësinë e tij për arritjet e realizuara siç tha nga Policia e Shtetit, arritje këto të vëna në pah nga një anketim i qeverisë suedeze mbi perceptimin e publikut për Policinë e Shtetit.
Gjetjet e hulumtimit shkencor të opinionit qytetar janë dëshmi e pakontestueshme e arritjeve të reformimit rrënjësor të Policisë së Shtetit, tha Çuçi, ku shumica dërrmuese e shqiptarëve aprovojnë punën e Policisë së Shtetit dhe shifrat e studimit, flasin qartë se jemi në kornizën europiane në shumë parametra të sigurisë.
“Ndjehem shumë mirë për këtë komunikim të policisë me publikun dhe ndryshim të punës së policisë nga publiku. Sondazhi vjen në një moment pak specifik, javën e kaluar kemi përjetuar një situatë pak jo të zakonshme, por që nxori në sipërfaqe atë kategori njerëzish që s’lënë pa hedhur baltë mbi punën e policisë dhe gjithë qeverisë. Rezultatet kanë dalë para atyre ngjarjeve. Tregojnë vjeshtën e 2020 se si e përcakton publiku punën e bërë nga policia”,- tha Çuçi.
“66% e publikut mendon se Policia e Shteti po bën një punë të mirë krahasuar kjo me 36% në vitin 2013. Shikoni se çfarë ndryshimi drastik! Gati dyfish ka pësuar perceptimi që policia bën mirë punën e vet, krahasuar me 2013-ën”, tha ministri Çuçi.
80% e të intervistuarve deklarojnë se ndihen të sigurt kur ecin vetëm në lagjen e tyre pasi është errësuar. Kjo theksoi ministri Çuçi është një pyetje e rëndësishme për të kuptuar se Policia e Shtetit jep garanci tek publiku.
“Pra, në një farë mënyre njerëzit ndihen më të sigurt, pikërisht sepse krimet kanë ardhur në rënie, dhe e mendojnë vetë, e perceptojnë vetë që nuk do i vijë asnjë e keqe”, theksoi ministri.
Përsa i përket shprehjes se vendimet dhe veprimet e Policisë së Shtetit janë të influencuara në mënyrë të padrejtë nga presionet e partive politike dhe politikanëve, 62% e të anketuarve besojnë se vendimet dhe veprimet e policisë janë të ndikuara në mënyrë të padrejtë nga presionet e partive politike dhe politikanëve. Megjithatë ka përmirësim krahasuar me vitin 2013, kur kjo shifër ishte në nivelin 71%.
“Kjo është shumë interesante, është një pyetje që iu jep përgjigje të gjithë atyre që nuk lënë vend pa shpifur, që Policia e Shtetit është bërë polici politike. Dhe është një përgjigje e drejtpërdrejtë, ku me kënaqësi e shohim që Shqipëria prapë është në një trajektore shumë pozitive, krahasuar me vendet e tjera. Shikoni ku kemi qenë në 2013, krahasuar me vendet europiane! Shiko ku është Shqipëria sot, në 2020, krahasuar me mesataren e vendeve europiane. Kemi lënë mbrapa madje edhe shtete si Mbretëria e Bashkuar, Holanda, Spanja apo Franca për sa i përket perceptimit se sa e politizuar është Policia e Shtetit. Më vjen shumë mirë që publiku nuk është ndikuar në masë nga balta që i bëhet nga politika e mbrapshtë dhe nga gjithë sulmet e padrejta që pëson Policia e Shtetit”, u shpreh ministri Çuçi duke vënë theksin te perpjekja e përbashkët për të përmirësuar më tej këtë marrëdhënie midis publikut dhe Policisë së Shtetit, e cila është themeli i funksionimit të një shteti që garanton zhvillimin e një shoqërie europiane siç është Shqipëria.
Një pikë tjetër e trajtuar në këtë studim është çështja e ryshfetit në radhët e Policisë së Shtetit. Publiku e vlerëson Policinë e Shtetit me notë mesatare 54. Ka përmirësim të dukshëm krahasuar me vitin 2013 kur ishim në të njëjtin nivel me Ukrainën, 74%. Sot jemi disa vende pranë mesatares së BE-së.
Përsa i përket kohës se sa shpejt mbërrin Policia e Shtetit në vendngjarje, ndryshe nga viti 2013 kur ishim të fundit në Europë, pasi vetëm 42% mendonin se policia do të arrinte jashtëzakonisht shpejt në vendin e ngjarjes, sot jemi në nivelin 59%, pranë vendeve si Holanda e Lituania dhe shumë pranë mesatares së Bashkimit Europian, 67%. Kjo nuk është fare e rastësishme, por vjen si rezultat edhe i investimeve në infrastrukturën e domosdoshme, siç është flota e rinovuar e mjeteve, komisariati dixhital etj.
Të pyetur lidhur me trajtimin me respekt nga ana e Policisë së Shtetit, sot jemi në nivelin 58%, vetëm 5% larg mesatares së Bashkimit Europian që është në nivelet 63%. Ndërkohë në vitin 2013 ishim pas Ukrainës, ku vetëm 20% e të anketuarve deklaronin se trajtoheshin shpesh me dinjitet nga Policia e Shtetit.
Ministri ndër të tjera falenderoi qeverinë suedeze që na asiston që prej 2013, për të rritur performancën, për t’i dhënë një fytyrë sa më komunitare Policisë së Shtetit.
(BalkanWeb)
