Sinan Idrizi hap gjyqin dhe kërkon 400 mijë euro nga bashkia. Bëhet fjalë për detyrimet e prapambetura që nga koha kur klubi administrohet nga bashkia. Për “Panorama Sport”, Idrizi konfirmoi dje edhe hapjen e procesit gjyqësor. “Jav- ën që u mbyll kemi depozituar dosjen në gjykatë kundër rreth 400 mijë euro bashkisë dhe të tjerë kursimtarëve.
Bëhet fjalë për 400 mijë euro që ka paguar ky zotëria këtu. Kemi gjyq me bashkinë dhe me të tjerë që kanë firmosur në emrin e bashkisë. Se kush janë mua nuk më intereson. Lekët që kam paguar dua të më rikthehen. Kemi gjyq edhe me trajnerin Gjoka për ilegalitet, evazion fiskal, shmangie të detyrimeve të shtetit dhe falsifikim. Nuk kam më komente në “Facebook” unë për gjyqet. Komente “Facebook”-u me pula që kakarisin, me gjela që këndojnë, unë nuk kam. Unë jam te vendi tani, te gjyqi atje, çfarë kam depozituar, çfarë më është marrë nga Flamurtari që nuk duhet t’i paguaja unë, dua të më rikthehen pasi më mbaron në qershor kontrata e menaxhimit të klubit. Dua çfarë kam paguar”, tha fillimisht Idrizi për “Panorama Sport”.
BORXHET
Administratori i Flamurtarit deklaron se do të kërkojë të gjitha lekët që i ka paguar për borxhe. Idrizi tha se Këshilli Bashkiak para tre vitesh miratoi 200 milionë lekë për borxhet, por prej tyre i kanë kaluar në arkën e klubit vetëm 28 milionë lekë. “Unë nuk i njoh me emra fare këta, por di që nga llogaritë e mia kam paguar maqedonasin Bajevski, që nuk e njoh, Gjokën që nuk e di se çfarë kontrate ka bërë me ata të tjerët.
Deri tani prita. Mua më ka kthyer vetë 28 milionë lekë bashkia nga këto që kam paguar unë. Para tre vitesh, Këshilli Bashkiak ka marrë vendim të ktheheshin 200 milionë lekë për borxhet e papaguara të Flamurtarit. Është puna e tij, djersa dhe mundi i tij, unë nuk e di si e ka pasur kontratën me të tjerët. E mbani mend kohën, ju që shkruanit në gazetë me germa të mëdha që po ikin lojtarët, nuk kanë lekë të paguajnë qiratë, nuk kanë bukë, etj, e mbani mend që thatë para tre vitesh? Mua më ishin bllokuar llogaritë nga Nini dhe nga një hotel. Më ishin bllokuar nga borxhet që nuk paguante ai burri, ky burri i “Facebook”-ut. Unë tani do vërtetoj në gjykatë se kush dërdëllis. Kanë shkruar që dërdëllisë dhe mashtron Idrizi. Tani do vemi në gjykatë. Unë nuk kam qejf të çoj njerëzit në gjyq, unë kam pritur.
Ai ka thënë mashtron dhe dërdëllis Idrizi. Edhe konton e atyre e pagova unë në kohën që kërkonin të falimentonin Flamurtarin këta. Hajdeni në gjyq të shikojmë kush dërdëllit dhe kush mashtron. Tani është kohë gjyqi nuk kemi çfarë bëjmë. Tani do të njoftohen zotërinjtë në adresën e shtëpive që kanë, besoj jam i sigurt që kanë adresa shtëpie. Gjyqin e parë e kam me Bashkinë dhe Këshillin Bashkiak. Se çfarë njohin apo çfarë nuk njohin këta është problem tjetër”, u shpreh administratori.
(BalkanWeb)
