TIRANË
Bashkëkryetari i Komisionit të Reformës Zgjedhore, Damian Gjiknuri ka folur për mediat pasi doli nga konferenca e cila u thirr nga OSBE-ja, ku pjesëmarrëse ishin të gjitha subjektet politike në vend, përfshirë edhe Partinë Demokratike. Ai tha se vendimi i PD-së dhe opozitës për të marrë pjesë në këtë konferencë është sinjal i qartë dhe i pastër dialogu mes palëve.
Ai kritikoi ashpër spektrin politik në Shqipëri, ku shtoi se problemi kryesor i tyre është fakti se nuk dinë të respektojnë rregullat brenda sistemit.
“Opozita brenda parlamentit është aty, ashtu siç e tha edhe Hajdari se largimi ka qenë një çështje emocionale. Unë e kuptoj tensionin që kanë opozita brenda dhe ajo jashtëparlamentare. Tryeza është sinjali i parë i dialogut mes palëve. Mesazhi doli i qartë se PD ka vijuar interesimin. Ne duhet të kërkojmë dialog nga të gjitha palët. Vetë Parlamenti ka marrë parasysh edhe elementin e opozitës jashtëparlamentare. Ndërkombëtarët janë pjesë e këtij procesi dhe jam i bindur se edhe pjesëmarrje PD është shenjë pozitive. Unë e thashë se mekanizma jashtë sistemit parlamentar është e vështirë të ketë, sepse reforma do të votohet në Kuvend. Unë aty përfaqësoj interesat e PS. Unë kam bërë një ofertë se nëse PD bëhet pjesë e komisionit, unë jam i gatshmë ta ri-shoh pozicionin tim në bashkëbisedim me kryetarin tim. Të gjitha palët akuzohen, kushdo që ka pushtet ka akuza. Ambasadori u shpreh i zhgënjyer me sjelljen. Aktorët nuk dinë të luajnë me rregullat e sistemit. Jemi duke diskutuar këtë çështje, ju siç e patë edhe nga ekspertët, çdo parti ka një qëndrim ndryshe në lidhje me sistemin”-tha ai.