TIRANË
Kryedemokrati Lulzim Basha është takuar sot me përfaqësues të Shoqatës së Biznesit të Vogël, pas të cilit ka folur për mediat. Basha tha nga selia e PD se mbështet kërkesat e biznesit të vogël dhe e gjithë vëmendja duhet të kthehet tek ky biznes.
Kreu i PD akuzoi qeverinë dhe kryeministrin Edi Rama për gjendjen dramatike siç e cilësoi ai të biznesit të vogël dhe foli për një pandemi ekonomike.
“Në vazhdën e takimeve që kam realizuar me përfaqësuesit e biznesit në Shqipëri sot kam takuar kryesinë e Shoqatës Kombëtare të Biznesit të Vogël. Biznesi i vogël është në vështirësi të mëdha dhe po shtyhet drejt falimentimit. Kjo rrezikon daljen të papunë të dhjetëra ndoshta qindra e mijëra të vetëpunësuarve nga ky sektor. Gjithë vëmendja e qeverisë është tek oligarkët nuk është tek njerëzit, nuk është tek biznesi por në veçanti tek biznesi i vogël. Por biznesi i vogël përbën motorin e ekonomisë shqiptare, përbën bazën e ekonomisë shqiptare dhe përfshin numrin më të madh të të vetëpunësuarve në këtë sektor. Paratë që ka paguar gjatë viteve, taksat që ka paguar gjatë viteve sot ka nevojë më shumë se kurrë t’i marrë mbrapsht ose si lehtësi fiskale ose si subvencionim, si mbështetje financiare. Po kështu ka nevojë për një paketë të qartë masash që do të mundësojnë hapjen graduale sipas protokolleve të sigurisë por jo hapje thjesht për të mos paguar bizneset. Sepse në qoftë se biznesi hapet por konsumatori nuk lejohet që të shkojë tek biznesi kuptohet qartë që situata është kaotike, është e pashpresë dhe do të vazhdojë të rëndohet”, deklaroi Basha.
Kreu i PD theksoi se biznesi i vogël po vuan dhe nga masa të tjera arbitrare të ndërmarra kuturu, siç është për shembull masa e faturës afrofe. “Fatura afrofe e energjisë e cila shkon me vlerën e marsit të vitit të kaluar tek biznese që kanë 6 javë që kanë ulur qepenat. Pra, në vend që të ndihmohen siç po i ndihmon çdo vend tjetër i rajonit, mos të flasim për Europën, siç po e ndihmon Kosova, siç po e ndihmon Maqedonia e Veriut, biznesi i vogël shqiptar po përballet me vështirësi të jashtëzakonshme që janë të shkaktuara nga mungesa totale e mbështetjes nga kjo qeveri.
Ndërkohë paratë e taksave të shqiptarëve vazhdojnë të shkojnë për oligarkët. Paratë e taksave të shqiptarëve shkojnë kudo përveçse aty ku ka më shumë se nevojë se kurrë shqiptarët sot, tek njerëzit në nevojë, tek biznesi i vogël, tek mbështetja tek ata që po humbin vendet e punës. Situata është dramatike”, u shpreh kreu i PD.
Basha tha se mbështesim totalisht kërkesat e drejta të biznesit të vogël. “E njohim dhe e kemi ndjekur gjendjen përpara pandemisë. Gjatë pandemisë në mënyrë pothuajse të përditshme kam qenë në kontakt jo vetëm me këta zotërinjtë, por edhe me përfaqësues të biznesit të vogël në qytetet kryesore të vendit. Dhe po vazhdojmë ta ndjekim në kushte kur nga njëra anë pretendohet mbështetje me fjalë, por nga ana tjetër biznesi vetë po denoncon se asnjë mbështetje nuk ka.
Me propagandë, me shfaqje televizive dhe me mashtrime, biznesi jo vetëm nuk po ndihmohet, por po zhytet gjithmonë e më thellë. Zhytja e biznesit të vogël në këtë situatë është parathënie e krizës ekonomike. Ndaj, e gjithë vëmendja jonë dhe e gjithë energjia jonë duhet të jetë tek pandemia ekonomike, që po i zë vendin pandemisë COVID 19. Është pandemia ekonomia 2020, që ka një autor dhe një shkaktar – këtë qeveri dhe këtë kryeministër, që e kanë braktisur biznesin në ditën e vet më të vështirë. Taksat ua kanë marrë për vite me radhë, taksat ua kanë rritur, faturat ua kanë rritur për vite me radhë. Tani që kanë nevojë për paratë e tyre, nuk po kërkojnë lëmoshë, asnjë nga ato dhjetëra mijëra biznese që nuk kanë parë asnjë qindarkë, megjithëse u është premtuar mbështetje, nuk kërkon lëmoshë, kërkon që të mbështetet nga taksat, sepse qeveria prandaj ekziston. Taksat që merr nga qytetarët, t’i përdorë për qytetarët. Sot, taksat që ka marrë nga biznesi i vogël, taksat që ka marrë nga të gjithë qytetarët, përfundojnë kudo, përveçse tek ata që kanë nevojë. Ose më mirë të themi, përfundojnë tek një grusht njerëzish, tek një grusht oligarkësh me të cilët, kjo qeveri vazhdon të ndajë favore, tendera korruptivë dhe pasuritë e vendit”, u shpreh Basha.
(BalkanWeb)
