Ish-presidenti i Republikës Bujar Nishani kërkon hetim parlamentar dhe penal për manipulimin e zgjedhjeve parlamentare dhe tërheqjen e kryeministrit Edi Rama nga padia për gazetarin gjerman.

Në një postim në “Facebook”, Nishani shkruan se ‘skandali i manipulimit të zgjedhjeve parlamentare i denoncuar me prova të forta nga media gjermane BILD, vijon të mbetet i mbyllur në sirtarët e Prokurorisë shqiptare’.

Sipas tij, hetimi penal mbi faktet e publikuara në median gjemane është i pamunudr pasi sot “është qartësuar për çdo shqiptar se qëllimi i asgjësimit të drejtësisë në Shqipëri dhe kapja politike e instrumentave të saj prej Edi Ramës dhe grupeve kriminale, ishte pikërisht garancia e pandëshkueshmërisë ndaj krimeve elektorale, korrupsionit dhe veprimtarisë së bandave krimanele që ekzekutojnë në praktikë këto krime”.

Ish-presidenti thotë se prova më e turpshme ishte e këtyre ditëve të fatkeqësisë prej pandemisë.
“Ndërsa shqiptarët janë të izoluar në shtëpi e blindat e ushtrisë me armatim të rëndë demonstrojnë rrugëve të kryeqytetit, kokaina dhe heroina vërshojnë lirshëm drejt brigjeve të Italisë. Ndërsa mijëra familje që veç ushqeheshin me do dyqane e bisnese të vogla, janë sot në depresion të madh pa asnjë ndihmë e siguri nga shteti i tyre, qeveria tenderon qindra milionë në mënyrë sekrete duke ua dhënë tregtarëve të kompjuterave që të na sigurojnë produktet ushqimore të emergjencës!”, shkruan Nishani.

POSTIMI I PLOTË
Skandali i manipulimit të zgjedhjeve parlamentare përmes përdorimit të policisë dhe krimit të organizuar, i denoncuar me prova të forta nga media gjermane BILD, vijon të mbetet i mbyllur në sirtarët e Prokurorisë shqiptare.

Po aq i madh ishte dhe skandali që pasoi, ai i proçesit të sulmit dhe përpjekjeve juridike të Edi Ramës ndaj gazetarit dhe gazetës gjermane, duke tentuar t’i ikë të vërtetës dhe gjykimit prej shqiptarëve.

Tashmë media ka dekkaruar se Edi Rama ka dështuar në kundërvënien e tij ndaj gazetarit gjerman duke u tërhequr nga pretendimi i tij se gazeta gjermane gënjen.
Edhe këtë tërheqje u mundua ta mbajë të fshehtë!

Ky skandal i ri kërkon dy hetime.
Së pari një hetim parlamentar, i cilin duhet të bëj transparencën mbi procedurën e ndjekur nga Kryeministri i vendit, (si i tillë ai është akuzuar dhe si i tillë ai ka reaguar), fondet e përdorura për këtë procedurë, infrastruktura e përdorur, arsyet e tërheqjes së kryeministrit! Ky hetim duhet të kërkojë ndihmën dhe bashkëpunimin e autoriteteve gjermane për të gjithë dokumentacionin dhe infrastrukturën që ka përdorur Kryeministri i Shqipërisë në Gjermani.
Ka zero shance që ky hetim parlamentar mund të ndodhë nga një parlament karikaturë qe mbahet në këmbë sot po nga ata që vodhën zgjedhjet dhe deformuan vullnetin e sovranit.
Por pavarësisht kësaj, skandali nuk zhbëhet dot, ai aty mbetet!

Së dyti, duhet një hetimi penal mbi faktet e publikuara në median gjemane, por dhe kundërakuzat, e rrëzuara tashmë, të Edi Ramës, servirur shqiptarëve prej tij.
As kjo nuk do mund të ndodhë aktualisht, pasi sot është qartësuar për çdo shqiptar se qëllimi i asgjësimit të drejtësisë në Shqipëri dhe kapja politike e instrumentave të saj prej Edi Ramës dhe grupeve kriminale, ishte pikërisht garancia e pandëshkueshmërisë ndaj krimeve elektorale, korrupsionit dhe veprimtarisë së bandave krimanele që ekzekutojnë në praktikë këto krime.
Prova më e turpshme ishte e këtyre ditëve të fatkeqësisë prej pandemisë.
Ndërsa shqiptarët janë të izoluar në shtëpi e blindat e ushtrisë me armatim të rëndë demonstrojnë rrugëve të kryeqytetit, kokaina dhe heroina vërshojnë lirshëm drejt brigjeve të Italisë.

Ndërsa mijëra familje që veç ushqeheshin me do dyqane e bisnese të vogla, janë sot në depresion të madh pa asnjë ndihmë e siguri nga shteti i tyre, qeveria tenderon qindra milionë në mënyrë sekrete duke ua dhënë tregtarëve të kompjuterave që të na sigurojnë produktet ushqimore të emergjencës!

Kjo ndodh sot pasi është garancia e pandëshkueshmërisë, ashtu si në skandalin (tashmë ndërkombëtar) të Edi Ramës me median gjermane. Megjithatë kjo nuk do të thotë që Shqipëria dhe shqiptarët janë groposur përfundimisht. Atë nuk e bëri dot as diktatura 50 vjeçare e komunistëve të Hoxhës.

Pikërisht pse krimet dhe modeli i asaj diktature nuk u përballën me drejtësinë, shqiptarët u përballën me përsëritjen e historisë, pavarësisht se në një formë karnavale të saj! #TëRingremëShqipërinë ! ??