Edhe avokatët e Korçës solidarizohen me kolegët në Elbasan e Tiranë dhe ndërpresin punën për tre ditë si dhe do të protestojnë pas vrasjes së avokatit të njohur Ravik Gurra.
Kreu i Dhomës së Avokatisë në Korçë, Arben Lena kërkoi të zbardhet vrasja e avokatit Gurra, në të kundërt paralajmëroi masa të tjera. Sipas tij, avokatëve sot iu rrezikohet jeta.
“Avokati humbi jetën në një atentat mafioz. Morëm vendim të bojkotojmë çdo shërbim. Përveç masave të sigurisë dhe asistencën ndaj te miturit. I bëjmë thirrje organeve të zbardhin ngjarjen. Jemi në mbështetje të kolegëve të Elbasanit. Protesta jonë do vazhdojë tre ditë. Jemi të rrezikuar. Po sulmohet institucioni i avokatit. Në Shqipëri është avokati i dytë që vritet. Nëse nuk zbardhet ngjarja, do marrim masa të tjera:,- tha Lena.
Ngjarja e rëndë ndodhi pranë një lokali të njohur në qendër të qytetit të Elbasanit rreth orës tetë të darkës të datës 22 mars dhe autori dyshohet se ka qene i maskuar. Viktima, Gurra, që njihet për mbrojtjen e çështjeve të bujshme si ajo e Çapjave dhe Shullazit, ka qenë i ulur në ambientet e lokalit jashtë kur është qëlluar pas koke. Ai ishte i shoqëruar me dy persona të tjerë në tavolinë, njëri prej tyre gjithashtu avokat. Autori që e ka qëlluar me pistoletë është larguar me një mjet që është gjetur i djegur në dalje të qytetit të Elbasanit. Policia ka ngritur postblloqe për kapjen e autorëve dhe zbardhjen e ngjarjes.
Ravik Gurra, babai i dy fëmijëve, prej vitesh bënte një jetë mes Shqipërisë dhe Britanisë së Madhe, ku jetonte bashkë me familjen që prej vitit 1998. Dy çështjet më të rëndësishme që 50-vjeçari ka mbrojtur në vendin tonë lidhen me fisin Çapja në Elbasan si dhe Emiljano Shullazin në Tiranë. Përveç Shqipërisë, Gurra ushtronte profesionin e avokatit dhe në Angli, ku kishte themeluar zyrën, ku kryesisht merrej me çështje të emigrantë shqiptarë në Britani.
HETIMET
Hetimet për zbardhjen e vrasjes së Ravik Gurrës i kanë kaluar Prokurorisë për Krimet e Rënda në Tiranë, pasi bëhet fjalë për ekzekutim të funksionarëve publikë. Grupi hetimor që po punon për zbardhjen e vrasjes mafioze, ende nuk ka një të dyshuar konkret, ndërkohë që për t’u marrë në pyetje janë shoqëruar shumë persona. Ngjarja ndodhi në qendër të qytetit, ku ndodhen dhe shumë institucione publike. Gjithçka ka qenë shumë e shpejtë sa dhe miqtë e tij dhe dëshmitarë në ambientet e jashtme të lokalit kanë menduar se avokatit i kanë rënë të fiktë kur e panë të shtrirë në tokë.
Hetuesit kanë sekuestruar dhe kamerat e sigurisë përgjatë itinerarit që autorët kanë përdorur për t’u larguar në mënyrë që të arrijnë në identifikimin e autorit dhe bashkëpunëtorëve të tij. Ka dyshime të forta se autori është paguar, ndërsa konsiderohet vrasje për shkak të detyrës.
(m.a/BalkanWeb)
