Për herë të parë legjenda e futbollit botëror, Diego Armando Maradona mund të vijë në Shqipëri. Nuk do të jetë një vizitë e thjeshtë por ylli i futbollit botëror pritet që të jetë në Shkodër në momentin kur të inaugurohet përfundimi i punimeve në stadiumin “Loro Boriçi.

Ende lajmi nuk është zyrtar por nga sa mësohet kanë nisur kontaktet dhe Maradonën dhe me shumë mundësi mundet që të vijë në Shkodër. Në fakt është një shkodran që po përpiqet që ta mundësojë ardhjen e një prej lojtarëve më të famshëm të të gjitha kohërave.

Është menaxheri Arjan Curri, një shkodran i cili prej 21 vitesh jeton dhe punon në Angli. Falë lidhjeve që ai ka, ka nisur kontaktet dhe shumë shpejt pritet që të marrë edhe një përgjigje pozitive. Menaxheri shkodran Arjan Curri mësohet se është një prej miqve më të mirë të Maradonës dhe falë lidhjes së tij miqësore do përpiqet që ardhja e argjentinasit në Shkodër të bëhet realitet. Gjatë muajit nëntor menaxheri Curri do ta takojë në një darkë konfidenciale Maradonën dhe aty do të diskutojë edhe më gjatë që ai të jetë në Shkodër në ditën kur do të inaugurohet stadiumi “Loro Boriçi”. E vetmja gjë që mund ta privojë Maradonën që të mos vijë është axhenda e tij me kombëtaren e Arabisë Saudite të cilën e drejton prej kohësh si trajner.

Deri tani bisedat janë pozitive dhe pak ditë pasi të vendoset data e inaugurimit të stadiumit të Shkodrës atëherë do të bëhet zyrtarisht i ditur lajmi edhe pse paraprakisht nga kontaktet e menaxherit Curri me Maradonën, lojtari mbresëlënës i kombëtares së Argjentinës dhe ekipit të Napolit në Itali janë në rrugën e duhur dhe tashmë pas pak kohësh duhet pritur nëse kjo ëndërr për shumë shkodran dhe shqiptar do të bëhet apo jo realitet.

(Panorama/BalkanWeb)

 

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb