Sekretari i Përgjithshëm i NATO-s, Jens Stoltenberg nënvizoi nevojën “urgjente” për të rritur mbështetjen ushtarake për Ukrainën, duke thënë se Rusia “nuk tregon asnjë shenjë të përgatitjes për paqe”.

Vërejtjet e tij erdhën në një deklaratë pasi ai mori pjesë në një takim të Grupit të Kontaktit të Mbrojtjes të Ukrainës të udhëhequr nga SHBA në Ramstein, Gjermani.

Përkundrazi, Rusia po përgatitet për një “luftë të gjatë”, tha Stoltenberg.

“Ashtu si shumica e luftërave, kjo ka të ngjarë të përfundojë në tryezën e negociatave,” tha ai, “… por ajo që ndodh në negociata është e lidhur drejtpërdrejt me atë që ndodh në fushën e betejës, kështu që ne duhet t’i dërgojmë më shumë armë Ukrainës tani.”

Stoltenberg mirëpriti njoftimet e fundit nga aleatët dhe partnerët e NATO-s, duke përfshirë Gjermaninë, Francën, Kanadanë, Danimarkën, Holandën dhe Suedinë në lidhje me mbrojtjen ajrore, mjetet luftarake të këmbësorisë dhe mjetet e blinduara.

Shefi i NATO-s mirëpriti gjithashtu që Britania e Madhe, Franca dhe Polonia janë të gatshme të dorëzojnë tanke kryesore luftarake dhe tanke të lehta, duke u bërë thirrje aleatëve dhe partnerëve të ndjekin shembullin.

Ai nënvizoi rëndësinë e shtimit të ndihmës ushtarake jovdekjeprurëse për Ukrainën dhe u kërkoi aleatëve të rrisin prodhimin e armëve dhe municioneve dhe të plotësojnë me shpejtësi rezervat.