Ministrja e Jashtme e Suedisë dënoi të hënën planet e Izraelit për të “marrë kontrollin” e Rripit të Gazës, duke thënë se ky veprim do të shkelte të drejtën ndërkombëtare.

Izraeli më herët këtë muaj miratoi planet për ofensivën e zgjeruar që është aktualisht në zhvillim e sipër dhe tha se ajo kishte për qëllim “pushtimin” e Gazës dhe zhvendosjen e popullit të saj.

“Ne do të marrim kontrollin e të gjithë territorit të Rripit të Gazës”, tha kryeministri izraelit Benjamin Netanyahu në një video të postuar në kanalin e tij Telegram të hënën.

«Nuk do të dorëzohemi. Por, për të pasur sukses, duhet të veprojmë në një mënyrë që nuk mund të ndalet», tha i.

Ministrja e Jashtme suedeze Maria Malmer Stenergard, vendi i së cilës e ka njohur shtetin palestinez që nga viti 2014, reagoi ashpër.

“Nëse kjo do të thotë aneksim, është kundër ligjit ndërkombëtar. Suedia qëndron e vendosur në bindjen e saj se territori i Gazës nuk duhet të ndryshohet ose zvogëlohet”, tha ajo.

Ajo gjithashtu i kërkoi Izraelit të lejojë rifillimin e ndihmës humanitare në Gaza, pasi Organizata Botërore e Shëndetësisë paralajmëroi se dy milionë njerëz po vuanin nga uria në territor.

“Në bisedimet tona, ne i kemi kërkuar vazhdimisht qeverisë së Izraelit të lejojë akses dhe shpërndarje të papenguar të ndihmave humanitare në përputhje me parimet humanitare”, tha ajo.

“Nevojitet një armëpushim dhe një fund i armiqësive, dhe pengjet duhet të lirohen — jo më shumë deklarata apo plane nga qeveria izraelite që përkeqësojnë situatën për civilët në Gaza.”

(A.A/BalkanWeb)