Ish-zëvendës Kryeministrja, Ledina Mandija, e ftuar në “Open” në News24 ka deklaruar se me veprime të tilla si shembja e “Prestige Resort”, kryeministri Rama po largon investitorët e huaj dhe vendas që kanë frikë të vijnë në Shqipëri e të investojnë paratë e tyre.
Mandija u shpreh se gjykatat nuk munden të kontrollojnë veprimet e qeverisë, ndërsa shtoi se janë pikërisht këto gjykata që më pas vendosin edhe për dëmshpërblimet.
“Kemi të bëjmë me rënie të shtetit të së drejtës, gjykatat nuk arrijnë të mbrojnë qytetarët e të kontrollojë veprimet e qeverisë. Rama nuk ka frikë, bën VKM që tejkalojnë ligjet dhe ligje që tejkalojnë Kushtetutën.
Veprimet e shkatërrimit dhe administrative që bëjnë Dallëndyshet në qeverinë Rama janë normale. Çështja këtu është gjykata. Ky rast tregon që qytetarët janë të pambrojtur e çdo inspektoriat i merr lejen, dhe nuk mban asnjë përgjegjësi. Dhe pastaj janë po këto gjykata që kontrollojnë dëmshpërblimet.
Ndaj investitorët e huaj kanë frikë të vijnë këtu. Nëse Hysenbelliu do të ishte i huaj do mbrohej nga Konventat ndërkombëtare dhe marrëveshje bilaterale, edhe pse Rama ka treguar se edhe me ta nuk e ka problem të bëjë beteja të tilla. Ky është rrezik i madh që stopon individët të vijnë në Shqipëri. Qeveri do të thotë të japë një leje zhvillimore që shkon tej një aplikanti të thjeshtë”, tha ajo.
(BalkanWeb)
