Presidenti francez Emmanuel Macron ka zhvilluar takimin e tij të parë si president me kancelaren gjermane Angela Merkel. Takimi ka zgjatur për disa minuta dhe pas kësaj presidenti Macron bashkë me Merkel kanë dalë një konferencë për mediat.
Merkel ka theksuar se zgjedhjet në Francë treguan sa e rëndësishme është Europa dhe se bashkëpunimi i Gjermanisë me Francën do të jetë më i madh.
Nga ana tjetër presidenti Macron tha se Europa duhet të jetë më pak burokratike dhe më shumë mbrojtëse.
Ai ka pranuar se Europa ndodhet në një moment kritik dhe ka theksuar se rruga e suksesit të dy vendeve është e lidhur ngushtë me suksesin e Bashkimit Europian.

Angela Merkel tha se të dyja qeveritë do të hartojnë një plan kohor afatmesëm, si mund të forcohet bashkimi monetar i Eurozonës.
Nëse nevojiten për këtë ndryshime të marrëveshjeve të BE, Gjermania është e gatshme për këtë, tha kancelarja.
“Nga pikëpamja gjermane është e mundur që të ndryshohen marrëveshjet, kur kjo ka kuptim”, tha Merkel.
Ky ndryshim nevojitet, nëse forcimi i eurozonës nuk synohet të arrihet vetëm me një marrëveshje ndër qeveritare.
Kancelarja kritikoi pozicionimin e disa shteteve të BE, të cilat i kundërshtojnë në parim ndryshimet e marrëveshjeve.
Macroni tha se “ndryshimet e marrëveshjeve (të BE) kanë qenë për një kohë të gjatë një tabu franceze”.
“Për mua kjo nuk është tabu”, tha ai. Macroni dëshiron para së gjithash një plan veprimi për reforma, si mund të bëhen më efikas BE dhe Eurozona. Po të rezultojë që për këtë nevojiten reforma të marrëveshjeve, ai është i gatshëm për to.

Paraardhësi i Macronit, François Hollande i pati kundërshtuar gjithmonë ndryshimet e marrëveshjeve të BE, sepse druhej se për këtë ndoshta në Francë do të nevojitej një referendum për ratifikimin.
Macron tha për qytetarët që e pritën me gëzim në kangjellat e Zyrës Kancelarore ardhjen e tij: për mua kjo është shumë emocionuese.
Ky është një sinjal për Evropën dhe është e rëndësishme që ky entuziazëm t’u rikthehet njerëzve, tha ai.
Edhe Merkel ka të njëjtin detyrim dhe përgjegjësi, shtoi Macron.
Ai tha se dëshira e tij është që për të brohoritet ende edhe kur të vijë pas pesë vjetësh në Berlin.
Ndërsa Merkeli tha për magjinë e çdo fillimi: një magji e tillë mban vetëm atëherë “kur pasojnë rezultate”.
Njësoj si Macron ajo dëshiron që njerëzit të vështrojnë të gëzuar dhe optimistë drejt së ardhmes. Dhe uron: “Për bashkëpunimin më të mirë të mundshëm.” /dw

(BalkanWeb)