TIRANE
Ka zgjatur rreth 70 minuta takimi mes zv.ndihmës sekretarit amerikan, Mathew Palmer dhe kryetares se LSI-së, Monika Kryemadhi në selinë e LSI-së. Pak pas takimit, Kryemadhi në një prenoncim për gazetarët u shpreh se nuk është e autorizuar të flasë rreth asaj që diskutoi. Kryemadhi, ndër të tjera theksoi se ‘hallet’ do të zgjidhen nga vetë shqiptarët.
Çfarë u diskutua në takimin me z. Palmer?
Diskutuam për situatën dhe sigurisht që unë nuk jam e autorizuar që të flas për takimin. Z. Palmer shprehu opsionet e veta nga këndvështrimet e tij.
Ne shprehëm opsionet tona nga këndvështrimet tona.
Sigurisht që përputhen për sa i përket raportit të Departamentit Amerikan të Shtetit për luftën kundër korrupsionit, për kapjen e shtetit, për të gjithë problemet e tjera, por është shumë e rëndësishme vazhdimi i mëtejshëm për zgjidhjen përfundimtare dhe për ti dhënë fund tranzicionit shqiptar. Shqipëria e ka vendin në BE.
Ju dha një zgjidhje z. Palmer, znj. Kryemadhi?
Palmer nuk kishte ardhur për t’i dhënë zgjidhje për sa i përket konfliktit. Mos harroni që hallet tona do ti zgjidhim ne shqiptarët vetëm me njëri-tjetrin.
Kemi zgjidhje për këto halle znj. Kryemadhi?
Sigurisht që mendoj që viktimat e gjithë kësaj historie, janë shqiptarët nuk është Kryeministri.
Më herët, Palmer, zhvilloi edhe një takim me gazetarët, ku u shpreh se është përgjegjësi e opozitës të marrë pjesë në zgjedhje.
“Inkurajoj të gjitha partitë të marrin pjesë në zgjedhjet e 30 qershorit. Nuk është zgjidhje djegia e mandateve. Do të ishte fatkeqësi nëse opozita nuk do merrte pjesë në këtë proces të rëndësishëm demokratik. Përgjegjësia e opozitës është të marrë pjesë në zgjedhje të ndajë vizionin me mbështetësit të punojë fort të ketë platformë politike atraktive të ketë kandidatë të fortë që të fitoje zgjedhjet” -tha Palmer në takimin me gazetarët.
Pas takimit me Kryemadhin, pritet që Palmer të zhvillojë një takim edhe me presidentin Ilir Meta.
(BalkanWeb)
