Talebanët kanë hyrë në kryeqytetin e Afganistanit, Kabul. Lajmi është konfirmuar nga një zyrtar i ministrisë së Brendshme, duke thënë se kryengritësit po futen nga të gjitha anët e qytetit.
Nga ana tjetër, Shtetet e Bashkuara dhe vendet e BE-së kanë nisur që të evakuojnë diplomatët nga ambasadat e tyre me helikopter e mjete të tjera.
Zyrtarët amerikanë thanë se diplomatët e tyre po transportoheshin në aeroport për t’u larguar nga vendi. Po ashtu, bëhet me dije se po dërgohen dhe ushtarë për të bërë të mundur evakuimin e sa më shumë qytetarëve dhe të shmanget ndonjë tragjedi.
Qeveria e Presidentit Ashraf Ghani duket se është në ditët e saj të fundit dhe pritet që të japë dorëheqjen. Një zyrtar taleban i tha Reuters se grupi nuk donte viktima, ndaj ka bërë thirrje për dorëzim dhe armëpushim.
Më herët, kryengritësit pushtuan qytetin lindor të Jalalabad pa luftë. Tashmë tilabanët kanë nën kontroll një pjesë të madhe të vendit dhe për pak ditë pritet që të kenë kontroll kudo.
(BalkanWeb)
