Në një kohë kur vendi ynë po përballet me pandeminë globale të COVId-19, qeveria ka ndërmarrë disa masa për frenimin e virusit, si për qytetarët, por dhe për shërbimet që ata marrin. Ndonëse në fillim të shumta ishin problemet që haseshin nëpër tregjet e vendit, siç duket qytetarët, por dhe vet tregtarët janë ndërgjegjësuar.
Në një raportim live nga Vlora, gazetari Enrik Mehmeti tha për ‘News24’ se situata në qytetin bregdetar është e qetë, ndërkohë që në tregje nuk ka fluks qytetarët. Ai pohoi se të gjithë tregtarët kanë respektuar masat, duke punuar me doreza dhe me maska, ndërkohë për ata që nuk kanë pasur të tilla, nuk janë lejuar që të ushtronin aktivitetin. Po ashtu Mehmeti tha se edhe qytetarët kanë respektuar distancën, ndonëse të shumë kanë qenë ata që nuk vendosnin maska dhe as dorashka.
Ndërkohë, nga Durrësi, në një raportim për ‘BalkanWeb’, gazetarja Klodjana Haxhiaj deklaron se situata në këtë qytet paraqitet e qetë dhe se qytetarët kanë respektuar distancën nëpër tregje.
E njëjta situatë duket se paraqitet në Fier, ku qytetarët i janë bindur rregullave teksa blejnë nëpër tregje. Në një lidhje live për ‘News24’ gazetari Ervis Kuçi pohoi se në tregje respektohet distanca mes tregtarëve dhe qytetarëve që shkojnë të blejnë. Teksa pohoi se në terren kanë zbarkuar 157 punonjës të Rrugores për të verifikuar nëse qytetarët lëvizin me autorizime, Kuçi tha se sot janë vendosur 7 masa administrative ndaj atyre që kanë dalë pa leje. Ndërkohë, dje u penalizuan 15 persona.
(BalkanWeb)
