TIRANË

Nënkryetari i LSI-së Petrit Vasili deklaron se të gjithë e dinë se kjo qeveri në kurriz të shqiptarëve shpërdoron dhe grabit fondet publikë dhe ndaj SHBA-të do të ngrenë Akademinë e Transparencës dhe llogaridhënier për fondet e mbledhura dje nga Konferenca e Donatorëve për rindërtimin në Shqipëri.

Në një postim në “Facebook”, Vasili shkruan se në mënyrë që këto fonde të kthehen në një ndihmë konkrete për shqiptarët në nevojë dhe jo zahire për qeverinë.

POSTIMI I VASILIT

Mirënjohje SHBA-së për transparencën dhe kontrollin mbi qeverinë për fondet e tërmetit!

SHBA do të krijojnë Akademinë e Transparencës dhe Llogaridhënies për fondet e donacioneve.

Të gjithë e dinë brenda dhe jashtë vendit dhe e kanë bindje, që kjo qeveri në kurriz të shqiptarëve vetëm shpërdoron, përvetëson dhe grabit fondet publike të të gjitha llojeve.

Ndaj edhe SHBA do të ngrenë Akademinë e Transparencës dhe Llogaridhënies duke akorduar 5 milion dollarë për ketë, në mënyrë që këto fonde të kthehen në një ndihmë konkrete për shqiptarët në nevojë dhe jo zahire për qeverinë.

Ja deklarata e Ambasadës së SHBA në Tiranë:

“Z.Matthew Palmer, Zv. Ndihmës Sekretari i Shtetit për Byronë e Çështjeve Europiane dhe Euro-Aziatike shpalli kontributin e fundit prej afro 5 milionë dollarë të qeverisë së Shteteve të Bashkuara të Amerikës për përpjekjet e rindërtimit pas tërmetit, gjatë fjalës së tij sot në Konferencën e Donatorëve të Komisionit Evropian për Shqipërinë. Shuma do të shkojë për themelimin e një akademie transparence, e cila do të ndihmojë Shqipërinë për administrimin në mënyrë transparente dhe llogaridhënëse të donacioneve të pas tërmetit dhe fondeve të tjera publike”.