Gjykata e Posaçme i ka komunikuar masën e sigurisë arrest me burg drejtuesit të prokurorisë së Kukësit Edmond Kariqi i cili dyshohet sipas SPAK për korrupsion. E njëjta masë sigurie iu komunikua dhe Isuf Gegës i cili dyshohet të ketë luajtur rolin e sekserit.

Gazetarja Klodiana Lala raportoi për “BalkanËeb” se nga të dhënat e lexuara nga prokurori Altin Dumani rezulton se më datë 21 nëntor 2019, në Kukës janë arrestuar shtetasit Ramadan Dedja, Eraldo Braka, Elidon Koka, Erges Xherri dhe Leandro Pasha, të cilët dyshoheshin për akuzën e mbajtjes dhe të prodhimit të lëndëve narkotike.

“Ndaj tyre gjykata e Kukësit ka caktuar aso kohe arrest me burg me afat 15-ditor në pritje të aktit të ekspertimit. Fillimisht kjo çështje është hetuar nga një prokuror tjetër, por më pas për shkak të lëvizjeve nga procesi i vettingut kjo dosje i ka kaluar prokurorit dhe njëherazi drejtuesit të komanduar të prokurorisë së Kukësit Edmond Kariqi. Sipas të dhënave të relatuara në seancë gjyqësore nga prokurori Dumani rezulton se shtetasit Emirjan Beu ka telefonuar Gegën dhe e ka pyetur nëse kishte njohje me prokurorin Edmond Kariqi. Gega ka pretenduar se ka njohje dhe ka udhëtuar me të nga Tirana në drejtim të Kukësit, ku sipas dyshimeve të prokurorisë ka zhvilluar në zyrën e prokurorit një takim. Më pas Dritan Dedja, vëllai i Ramazan Dedjas i cili ka komunikuar në mënyrë të vazhdueshme me Isuf Gegën duke tentuar dhe duke ndërhyrë për lirimin nga burgu të vëllait të tij Ramadan Dedja”, raportoi Lala.

Sipas hetimeve të prokurorisë, rezulton që Dritan Dedja dëgjohet teksa telefonon një të afërm dhe i thotë se ‘të hënën do t’i dërgojmë paratë’. “Më pas thotë prokuroria Dritan Dedja dhe Emirjan Beu kanë shkuar në një pikë të këmbimit valutor në pronësi të babait të një tjetër të arrestuari nga ky grup dhe kanë këmbyer lekët nga dollarë në euro. Bëhet fjalë për 2 mijë euro të cilat dyshohet se i janë dhënë prokurorit Kariqi. Më pas sipas akuzës, është filmuar vetë prokurori, i ulur në të njëjtën tavolinë me Isuf Gegën dhe Dritan Dedjan.

Fillimisht është ulur drejtuesi i prokurorisë së Kukësit, bashkë me Gegën dhe pasi kanë biseduar për disa minuta, Gega është larguar për t’u kthyer më pas në një tjetër lokal bashkë me Dritan Dedjan. Në finale, pasi janë kryer të gjitha këto veprime dhe takime ndërmjetësuese mes palëve, Prokuroria e Posaçme kundër korrupsionit dhe krimit të organizuar relatoi në seancë se është kryer një akt ekspertimi, i cili nuk është dorëzuar sipas ligjit, por është marrë dorazi dhe sipas këtij akti ekspertimi që kishte të bënte me lëndën narkotike, prokurori Kariqi ka vendosur dhe pushimin e çështjes për personat që ishin arrestuar në nëntor 2019. SPAK ka pritur deri sa prokurori të firmoste vendimin e pushimit të çështjes dhe më pas ka ndërhyrë duke bërë arrestimin e tij në shëtitoren kryesore në Kavajë bahskë me Isuf Gegën. Ndërkohë që dy personat e tjerë, Beu dhe Dedja nuk janë arrestuar ende.

Në seancën që u zhvillua me dyer të mbyllura, prokurori Ardjan Haxhi këmbënguli fortë sipas tij për një masë më të lehtë sigurie duke argumentuar dhe duke këmbëngulur se nuk ka asnjë fakt apo provë që kompromenton prokurorin apo e lidh atë me ndonjë veprimtari të mundshme kriminale. Megjithatë të gjitha argumentet u rrëzuan nga gjyqtarja e gatshme, njëherazi kryetarja e Gjykatës Irena Gjoka e cila vendosi ta lërë në fuqi të njëjtën masë që kishte marrë në mungesë për drejtuesin e prokurorisë së Kukësit Kariqi dhe Isuf Gegën. Duhet theksuar se zoti Kariqi futet në listën e zyrtarëve të drejtësisë të arrestuar së fundmi. Më herët është arrestuar Enkeleida Hoxha, ish-gjyqtare e Krujës që lironte bosët e krimit me kusht. Më pas Sali Hasa, prokurori i Sarandës, Edmond Kariqi, drejtuesi i prokurorisë së Kukësit dhe vetëm dje SPAK informoi se ka dërguar nën masën e arrestit në shtëpi Maksim Sotën, prokuror në Vlorë, i cili dyshohet për shpërdorim detyre dhe që kishte pasur kontakte dhe njohje me trafikantë droge”, raportoi Lala.

Sikurse rezulton nga dosja, përgjimi dhe vëzhgimi i këtyre personave të përfshirë në këtë veprimtari kriminale ka nisur dy javë pasi është bërë aksioni policor. Ramadan Dedja me të tjerë janë arrestuar më 21 nëntor 2019 për çështje droge dhe dy javë pas këtij aksioni kanë filluar kontaktet e para mes Emirjan Beut, Dritan Dedjas dhe Isuf Gegës.

“Kanë vijuar për gati 2 vite deri sa është pritur marrja e vendimit nga prokurori. Në momentin që drejtuesi i prokurorisë së Kukësit Kariqi nuk do merrte vendim, atëherë SPAK arsyeton në vendimin e tij se nuk mund të ndërhynte për aq kohë sa nuk ishte finalizuar i gjithë veprimi. SPAK mendon që prokurori e ka pushuar çështjen penale ndaj këtyre personave të dyshuar për çështje droge, pasi ka marrë për njërin prej tyre shumën prej 2 mijë eurosh.

Këto para i janë dorëzuar prokurorit që të pushonte çështjen. Avokatët thanë jashtë kamerave, se do ta kundërshtojnë këtë vendim në Gjykatën e Apelit me arsyetimin sipas tyre që nuk kishte prova për përfshirjen e tij në korrupsion.

Sa i përket karrierës së prokurorit pritet që KLP tashmë të mblidhet dhe të bëjë pezullimin e tij, deri sa drejtësia të thotë fjalën e fundit nëse prokurori Kariqi është i përfshirë ose jo në korrupsion pasiv”, raportoi gazetarja Lala.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb