Mjeku i njohur Skënder Brataj ka dhënë një mesazh ngushëllimi për mjekun gjinekolog nga Vlora, Leonard Kamberi, i cili ndërroi sot jetë. Brataj shprehet se me Kamberin ka qenë edhe shok fakulteti.
“Dr. Leonard Kamberi na hidhërove shumë me largimin e parakohshëm. Shokë fakulteti, mik dhe koleg i përgatitur dhe i përkushtuar, Covid-19 nuk të kurseu as ty. Lamtumirë dhe të qoftë dheu i lehtë”, shkruan Brataj në rrjetet sociale.
Më herët, mesazh ngushëllimi ka dërguar edhe kryetari i Bashkisë së Vlorës, Dritan Leli, që zbuloi se Kamberi priste të bëhej baba së shpejti.
Leonard Kamberi ka punuar në Maternitetin e Vlorës, ndërsa aktualisht punonte në një klinikë private dhe ishte pedagog në Departamentin e Shëndetit Publik.
50-vjeçari ishte i shtruar prej dy javësh në spital në Tiranë, por nuk ia doli ta fitojë betejën me koronavirusin.
(d.xh/ Balkanweb)
