Duke marrë shkas nga publikimi i lajmit në lidhje me propozimin e KLGJ për reduktimin e numrit të gjykatave në shkallë vendi dhe krijimin e një gjykate të vetme apeli civil dhe penal, me seli në Tiranë, në emër të të gjithe avokatëve që janë anëtarë të dhomës së avokatisë Korcë, avokat Arben Lena ka dalë në një deklaratë për mediat në kundërshti të këtij projekti që cënon një nga parimet bazë të zhvillimit të procesut të rregullt ligjor sic është gjykimi brënda një afati kohor të arsyeshëm,i cili do të vështirësojë aksesin  pranë sistemit gjyqësor të banorëve të këtyre zonave.

Sipas avokatit Lena, ky projekt me një gjykatë apeli është një projekt i cili ka qenë funksional deri në vitin 1999 dhe ka qenë një praktikë që nuk funksiononte pasi aksesi i qytetarëve  në drejtësi duhet të jetë efektiv ndërkohë sipas avokatit do të krijohet një pamundësi për të ndjekur proceset gjyqësore.

Gazetarja Lorena Kodra raporton për “Balkanweb” se të gjithë anëtarët e dhomës së avokatisë Korcë, kanë  firmosur një notë proteste të cilën ja kanë drejtuar KLGJ-së, Ministrisë se Drejtësisë, Komisionit të Ligjeve dhe Këshillit të Ministrave.

Sipas Lenës, kërkohet që  gjykata e apelit në Korcë të mos lëvizë, pasi është  i pamundur funksionimi normal i drejtësisë në këtë prefekturë.

Fjala e Lenës (Është e pamundur që një qytetar i Leskovikut të shkojë dhe të kërkojë zgjidhje në apelin e Tiranës. Është e pamundur që avokatët në Korcë për një cështje të zakonshme të shkojnë deri në Tiranë, pasi do të thotë humbje e ditës dhe efikasitetit dhe  është e pamundur për zgjidhjen e ceshtjeve, pasi një gjykatë e vetme do të ngarkohet  me të gjitha cështjen e Shqipërisë).

Ky projekt i cili nuk ka funksionuar dikur dhe është e vërtetuar, nuk do ti vijë në ndihmë sistemit gjyqësor  por do ta futë sistemin në një vorbull pa zgjidhje.

Në fjalën e tij dhe të gjithë avokatëve që kanë firmosur këtë notë proteste zgjidhja më e mirë është plotësimi i gjykatave të apelit dhe jo eliminimi i tyre, pasi me plotësimin e gjykatës së apelit shumë probleme apo cështje që kërkojnë zgjidhje në Korcë do të zgjidhen. Gjykata e Apelit në Korcë pavarësisht se funksionon me gjysmën e gjyqtarëve ka efikasitet, largimi i saj do krijojë kolaps total.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb