Papa Françesku ka vendosur të dërgojë një kontribut të parë prej 100 mijë eurosh për ndihmë për popullatën shqiptare, të goditur nga tërmeti, në këtë fazë të menjëhershme emergjente.


Lajmi u raportua nga dikasteri pontifikal pas tërmetit të fortë që goditi bregdetin verior të Shqipërisë në zonën e qytetit të Durrësit natën e 25-26 nëntorit.
Deri më tani, ka dhjetëra viktima dhe të paktën 600 të plagosur, por shumë njerëz janë ende nën rrënoja. Tërmeti ka lënë dëme të mëdha prapa, janë shembur ndërtesa dhe qindra njerëz kanë mbetur të pastrehë, dhe është paralajmëruar në zona të tjera të Shqipërisë dhe bregdetit të Adriatikut.


“Në këtë mënyrë Ati i Shenjtë dëshiron të shprehë afërsinë e tij shpirtërore dhe mbështetjen e tij atërore ndaj njerëzve dhe territoreve të prekura”, thuhet në komunikatë, e cila thotë se “shuma do të përdoret në dioqezat e përfshira në tërmet në vepra lehtësimi dhe ndihme, në marrëveshje me nunciaturën apostolike në Shqipëri”.


Kontributi, i cili shoqëron lutjen e Atit të Shenjtë për popullsinë e Shqipërisë, është pjesë e ndihmës që po aktivizohet në të gjithë Kishën Katolike dhe që përfshin, përveç Konferencave të ndryshme Episkopale, edhe shumë organizata bamirësie.

“Do të doja të dërgoja një përshëndetje dhe i jam afër popullit të dashur shqiptar, i cili ka vuajtur kaq shumë këto ditë”, tha Papa gjatë seancës së të mërkurës: “Shqipëria ishte vendi i parë evropian që doja të vizitoja. Jam afër viktimave, lutem për të vdekurit, për të plagosurit, për familjet. Zoti e bekoftë këtë popull, të cilin e dua aq shumë”.

(m.k/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb