“Ju lutem mos më deportoni në Rusi sepse atje do të më vrasin.” Me këto fjale shtetasi rus, Rasul Miklaev i është drejtuar trupës gjykuese e cila do të shqyrtonte kërkesën per ekstradimin e tij në Rusi pasi u arrestua për përfshirje dhe lidhje me organizata terroriste. Përtej xhamit të kafazit të hekurt Mislaev dukej i qetë dhe madje edhe i buzëqeshur teksa i ndihmuar nga përkthyesja iu përgjigjej pyetjeve të trupës gjykuese.
Avokati i 34-vjeçarit kërkoi më shumë kohë për t’u njohur me dosjen e klientit të tij që në fund të seancës u vendos që të zhvillohet në 10 shtator pasi mungonte përfaqësuesi i Prokurorisë.
Drejtoria e Antiterrorit të policisë së shtetit e ndaloi 34 vjecarin me banim në Çeçeni në 12 korrik ne qendrën e mbyllur të emigrantëve të paligjshëm në Karreç të Vorë. Mislaev është pjesë e grupit terrorist ISIS, që nga viti 2013, kur është larguar nga Rusia për në Siri.
Ai i është bashkuar grupit, duke qenë pjesëmarrës aktiv në luftime kundër forcave qeveritare në Siri. Ai kishte hyrë në Shqipëri si emigrant i paligjshëm nga Greqia para 1 viti por ishte ndaluar në doganën e Kakavijës, për kalim të paligjshëm kufiri. Që prej këtij momenti ai u mbajt në qendrën e mbyllur të emigrantëve të paligjshëm ndërsa kanë vijuar hetimet mbi lidhjet që mund të kishte me ndonjë grup.
