Suksesi ndaj Hungarisë ndezi edhe një herë ambientin rreth ekipit përfaqësues, tifozët, lojtarët, stafi, të gjithë u bënë bashkë duke arritur një fitore jetike që mban të ndezur aventurën e Shqipërisë në kualifikueset e botërorit. Të shihje “Elbasan Arena” sërish me ngjyrat kuqezi të linte një ndjesi shumë të mirë, prezenca e tyre në stadium u ndje shumë duke motivuar lojtarët deri në minutën e fundit. Tifozët tani kërkojnë suksesin e radhës, madje ndaj San Marino shpresojnë një fitore me goleadë për ti bërë një mbyllje shumë pozitive ndeshjeve të shtatorit.
Lojtarët gjithashtu shpresojë të shohin sërish tifozët në stadium por interesimi nga ana e tyre ka qenë i paktën, të paktën deri më tani. Deri në këto momente janë shitur më pak se 3 mijë bileta, por një situatë e ngjashme ndodhi edhe ndaj Hungarisë ku tifozët e kishin lënë për në orët e fundit për të blerë një biletë. Për fat të keq, ky është një trend ku tifozët në sfida të tilla “harrojnë” Kombëtaren, por këto janë pikërisht ato ndeshje ku prania e tyre është e domosdoshme për ti dhënë lojtarëve një shtysë më shumë.
(BalkanWeb)