Një gjysmëfinale që në fillim të sezonit askush nuk e priste në Champions League. Por futbolli është i bukur edhe për suprizat që dhuron. Dhe sfida Tottenham-Ajax është një surprizë e bukur për atë që dy skuadrat kanë dhuruar gjatë këtij edicioni në turneun më të rëndësishëm për klube në kontinentin e vjetër.

“Shpirti me të cilin kemi ndërtuar këtë skuadër na mëson se mund të arrijmë çdo rezultat. Gjithçka është mundur. Kjo është forca jonë dhe jam i lumtur që te Tottenham më kanë lejuar të ndjek principet e mia”, ishin fjalët e Mauricio Pochettino në konferencën për mediat përpara sfidës kundër Ajax.

Tekniku duket se e çon mendimin e tij shumë larg, por më parë duhet të kalojë formacionin holandez, që nxorri nga gara një prej favoritëve kryesorë siç ishte Juventus. Në këtë mision ndeshja e parë në shtëpinë e anglezëve është shumë e rëndësishme. “Nuk ndodh shpesh që Tottenham të luajë një gjysmëfinale në Champions, madje kjo është herë e parë. Nuk do të jetë e lehtë. Pres një sfidë të ekuilibruar dhe duhet të respetojmë rivalët, pasi Ajax është këtu me meritë”, ka vijuar Pochettino. Harry Kane është mungesa e madhe e Tottenham, që gjithashtu duhet t’i bëjë llogaritë edhe pa koreano-jugorin Son, i pezulluar për shkak të kartonëve.
(balkanweb)