Legjenda braziliane e futbollit, Pele, një nga lojtarët më të mëdhenj të historisë, ka vdekur në moshën 82-vjeçare.

Ai vlerësohet se ka shënuar një rekord botëror prej 1.281 gola në 1.363 paraqitje gjatë karrierës 21-vjeçare, duke përfshirë 77 gola në 92 ndeshje për vendin e tij.

I vetmi lojtar që fitoi Kupën e Botës tre herë, duke ngritur trofeun në 1958, 1962 dhe 1970, Pele u shpall Lojtari i Shekullit nga FIFA në 2000.

Presidenti brazilian ka shpallur tre ditë zie kombëtare. Pele vuante nga problemet e veshkave dhe prostatës vitet e fundit. Ai iu nënshtrua një operacioni për të hequr një tumor nga zorra e trashë në shtator 2021 në spitalin “Albert Einstein” në Sao Paulo, pasi u diagnostikua me tumor në testet rutinë. Ai u shtrua në spital në fund të nëntorit 2022.

Vajza e tij, Keli Naskimento i ka mbajtur fansat të përditësuar për gjendjen e babait të saj me postime në rrjetet sociale nga spitali.

“Gjithçka që jemi është falë teje. Ne të duam pafundësisht. Pusho në paqe”, shkroi ajo në një postim, duke njoftuar vdekjen e Pele.

Spitali konfirmoi se legjenda braziliane vdiq “për shkak të dështimit të organeve të shumta, si rezultat i përparimit të kancerit të zorrës së trashë”.

Konfederata Braziliane e Futbollit shktoi: “Pele ishte shumë më tepër se sportisti më i mirë i të gjitha kohërave. Mbreti ynë i futbollit ishte eksponenti më i madh i një Brazili fitimtar, i cili kurrë nuk u frikësua kur u përball me vështirësi. Ai i premtoi babait të tij një Kupë Bote dhe na dha tre. Mbreti na dha një Brazil të ri dhe ne jemi shumë mirënjohës për trashëgiminë e tij. Faleminderit, Pele.”

Ish-klubi i Pele, Santos, publikoi detaje të funeralit të tij. Të hënën në mëngjes trupi i tij do të zhvendoset nga spitali në stadiumin Estadio Urbano Caldeira, ku arkivoli do të vendoset në qendër të fushës që publiku të bëjë nderime.

Të martën, do të ketë një procesion nëpër rrugët e Santos në Sao Paulo dhe më pas do varroset nga familjarët.

Edson Arantes do Nascimento, i njohur më mirë si Pele, u bë një yll global kur, në moshën 17-vjeçare, ndihmoi Brazilin të fitonte Kupën e Botës 1958 në Suedi.

Ai shënoi golin e vetëm në fitoren 1-0 ndaj Uellsit në çerekfinale, një hat-trick kundër Francës në gjysmëfinale dhe dy në një triumf 5-2 ndaj mikpritësve në finale.

Pele kishte bërë debutimin e tij për klubin Santos në moshën 15-vjeçare, duke shënuar në një fitore 7-1 ndaj Corinthians de Santo Andre.

Konfederata Braziliane e Futbollit dhe Santos thonë se Pele shënoi 1.283 gola në 1.367 ndeshje, ndërsa FIFA pretendon se ishte 1.281 gola në 1.366 ndeshje.

Në Kupën e Botës 1962, Pele, atëherë 21 vjeç, shënoi një gol në fitoren 2-0 ndaj Meksikës për të hapur fushatën e tyre, por u dëmtua në ndeshjen tjetër dhe e pa nga stoli teksa ekipi i tij mbronte titullin.

Pjesa e fundit e trilogjisë së tij të fitoreve të Kupës së Botës ishte më ikonikia e tij.

Pasi u përjashtua nga turneu i vitit 1966 në Angli, ai ishte pikëmbështetja e një skuadre sulmuese emocionuese që fitoi titullin në vitin 1970, duke shënuar goli në fitoren 4-1 ndaj Italisë në finale.

Nga lotët e tij të gëzueshëm në gjoksin e shokut të skuadrës Nilton Santos e deri te përqafimi i tij me kapitenin e Anglisë, Bobby Moore, momentet magjike të Pele kanë kaluar epoka dhe kanë përcaktuar historinë e sportit.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: