Gjykata greke ka hedhur poshtë akuzat për spiunazh ndaj 24 aktivistëve të përfshirë në shpëtimin e njerëzve nga anijet me emigrantë në Mesdhe, pasi pranoi se çështja ishte e mbushur me gabime procedurale.
Trupi gjykues prej tre anëtarësh mbështeti rekomandimin e prokurorit që akuzat për spiunazh të hiqen mbi bazën e çështjes si “shumë të paqartë”.
“Ky është një hap i parë shumë i mirë, edhe pse ne nuk po festojmë ende. Një hetim penal mbi akuzat për krime të ngritura gjithashtu ndaj grupit është ende në vazhdim. Por rezultati i sotëm me siguri do të dëmtojë ndjekjen e këtij rasti”, ka deklaruar avokati mbrojtës Zacharias Kesses.
Të akuzuarit, si shtetas grekë ashtu edhe të huaj, përfshinin Sarah Mardini, refugjate siriane e kthyer në punëtore shpëtimi, historia e së cilës në shpëtimin e 18 bashkë pasagjereve teksa bënin kalimin e rrezikshëm nga Turqia frymëzoi filmin e Netflix -it “The Swimmers”.
Kesses, e cila drejton ekipin e saj ligjor, u shpreh se 27-vjeçarja nuk kishte qenë e pranishme në procedurë për shkak të një ndalimi udhëtimi që e identifikonte atë si një rrezik sigurie. Mardini kaloi më shumë se 100 ditë në paraburgim në burgun e sigurisë së lartë të kryeqytetit grek, Koryadallos, pas arrestimit të saj në gusht 2021.
(BalkanWeb)
