HONG KONG
Manjati mediatik i Hong Kongut dhe mbështetësi pro-demokracisë, Jimmy Lai është akuzuar për mashtrim dhe është arrestuar deri në një seancë gjyqësore në prill të vitit të ardhshëm.
Të enjten një gjykatë i mohoi atij dorëzaninë për një akuzë në lidhje me përdorimin e paligjshëm të lokaleve të ndërmarrjes së tij, shkruajnë mediat ndërkombëtare. Kjo vjen një ditë pasi tre aktivistë të shquar pro-demokracisë u burgosën.
Arrestimet kanë ngritur frikën e një goditje të re ndaj aktivistëve të qytetit dhe figurave të medias, nxitur nga një ligj i ri i diskutueshëm i sigurisë.
Lai, 72 vjeç, u arrestua të mërkurën në mbrëmje së bashku me dy drejtues të tjerë të lartë nga kompania mediatike Next Digital. Lai është themeluesi i Next Digital i cili boton Apple Daily, një tabloid që ka shumë lexues, i cili shpesh kritikon udhëheqjen e Hong Kongut dhe të Kinës.
Të enjten, të tre burrat u paraqitën në gjykatë për t’u përballur me akuza në lidhje me përdorimin e pretenduar të paligjshëm të selisë së kompanisë së tyre për qëllime që nuk lejohen. Nuk u dhanë detaje të tjera për rastin.
Sipas një raporti të Apple Daily, gjykatësi që kryesonte çështjen ishte ai që ishte zgjedhur nga udhëheqësi i qytetit Carrie Lam për të trajtuar çështjet e sigurisë kombëtare.
Një nga mbështetësit më të shquar të qytetit të lëvizjes pro-demokracisë Lai vlerësohet të ketë pasuri më shumë se 1 miliardë dollarë (766 milionë). Pasi bëri pasurinë e tij fillestare në industrinë e veshjeve, ai më vonë u fut në media dhe themeloi Next Digital.
Lai përballet gjithashtu me akuza të veçanta të “bashkëpunimit me forcat e huaja” sipas ligjit të ri të sigurisë kombëtare.
Ai u arrestua në gusht, duke u bërë personi me profilin më të lartë në Hong Kong që u ndalua sipas ligjit dhe zyrat e tij të gazetave u bastisën nga qindra oficerë policie. Ai më vonë u la i lirë me kusht, por i tha BBC atëherë se arrestimi ishte “vetëm fillimi”.
Kina ka thënë se ligji i ri do të kthejë stabilitetin në territor pas një viti trazirash, por ka kritikë ndaj këtij ligji. Të mërkurën, aktivistët Joshua Uong, Ivan Lam dhe Agnes Chou u dënuan me burg për përfshirjen e tyre në protesta masive vitin e kaluar.
(d.xh/ Balkanweb)
