Luftanija më e madhe që zotëron marina e Mbretërisë së Bashkuar është prishur në brigjet jugore të ishullit vetëm pak kohë pasi u nis në një “mision historik” në Shtetet e Bashkuara.
“HMS Prince of Wales” u largua nga porti i Portsmouth të shtunën dhe vetëm pak pasi kishte dalë në det të hapur, u shfaq një “problem mekanik”.
“HMS Prince of Wales mbetet në zonën e stërvitjes në Bregun e Jugut ndërsa po kryen hetime për një problem mekanik”, tha një zëdhënës i Marinës Mbretërore.
Por pavarësisht kësaj, The Times sqaron se Marina britanike zakonisht nuk zbulon gjendjen e vërtetë materiale të anijeve të saj.
Aeroplanmbajtësja, e cila ka kapacitetin për të mbajtur rreth 1,600 anëtarë personeli, është ankoruar kështu në juglindje të Isle of Wight dhe zhytësit janë duke inspektuar anijen poshtë vijës ujore, sipas UK Defense Journal.
Luftanija 65,000 tonëshe ishte nisur në një mision për të formësuar të ardhmen e operacioneve të avionëve stealth dhe dronëve në brigjet e Amerikës së Veriut dhe në Karaibe. Ajo ishte planifikuar të bënte ndalesa portuale në Nju Jork, Halifax në Kanada dhe Karaibe për të punuar me aleatët e SHBA-së, duke operuar avionë F-35B dhe sisteme pa ekuipazh.
HMS Prince of Wales, e cila u bë plotësisht funksionale vetëm vitin e kaluar, do të priste gjithashtu konferencën e Forumit të Ardhmërisë së Atlantikut për të forcuar lidhjet në Mbretërinë e Bashkuar dhe SHBA.
Në vitin 2020, anija, me vlerë 3 miliardë paund, pësoi dy përmbytje në hapësirën e pesë muajve.
Videoja e filmuar nga anëtarët e ekuipazhit tregoi më pas rreth 3 metra ujë pas një rrjedhjeje në dhomën e motorit, duke shpërthyer nga shkallët dhe duke “pushtuar” dollapët elektrikë dhe tubat.
Një sistem i brendshëm pati një defekt që shkaktoi përmbytjen në bordin e anijes luftarake ndërsa ajo ishte në Portsmouth, porti i saj i origjinës. Disa muaj më parë ishte shfaqur video e ujit që derdhej përmes tavanit në një zonë akomodimi.
HMS Queen Elizabeth, anija simotër e saj, përfundoi një cikël prej 26,000 milje detare vitin e kaluar, ndërsa HMS Prince of Wales operoi në Rrethin Arktik në prill për një vizitë në ishullin vullkanik norvegjez të Jan Mayen.
