I ftuar në programin “Dola te Ola” këtë të diel ishte analisti i njohur Zeka, i cili rrugëtoi nëpër kujtime dhe bëri rrëfime rrëqethëse nga periudha e luftës në Kosovë.

Teksa u shfaq një fotografi kur ka qenë në klasën e pestë fillore, Milaimi tregoi se është realizuar nga profesori i tij dhe është botuar në gazetën “Rilindja”, gazeta më e madhe në Prishtinë asokohe, pasi ai fitoi vendin e parë për një poezi që kishte bërë për Kosovën dhe Shqipërinë.

“Vrejta një bankë përmes ishte thyer, nga lotët e saj tepër ishte zhlyer, e pyeta bankën çfarë të ka gjet, ajo e përlotur mezi nis e flet“, vargje të cilat analisti i kujtoi në studio dhe u përlot, teksa shtoi se Kosova e ka vuajtur shumë ndarjen nga Shqipëria, dhe me anë të kësaj poezie ai ka shprehur dashurinë e prindërve të tij për vendin e tyre.

Milaim Zeka gjatë programin rrëfeu edhe momentin kur është plagosur në luftë në vitin 1999, dhe është operuar pa narkozë. Ai tha se ka qëndruar për 3 muaj në luftë dhe gjatë plagosjes u dogj në të gjithë trupin, si pasojë e një bombe prej 2 mijë kilogramësh, e cila u hodh ku ndodheshin ata. Nga ajo bombë 26 vetë mbetën të vdekur.

Analisti tregoi se vajta e tij në luftë ishte diçka e brendshme të cilën ai e ndjeu për ta bërë, teksa rrëfeu edhe masakrën që i ishte bërë një gruaje në fshatin e tij, ku një nënë i kishin prerë gjoksin dhe me gjakun që rridhte prej tij i kishin mbushur biberonin fëmijës së saj dhe ia kishin dhënë ta pinte.
Milaimi theksoi se filmime të tilla bënë që më pas të merreshin masa që Kosova të fitonte lirinë.

(BalkanWeb)