Udhëheqësja e ekstremit të djathtë të Francës, Marine Le Pen, në një vizitë në Budapest të martën, akuzoi BE-në për “brutalitet ideologjik” dhe shprehu mbështetje për kryeministrin hungarez Viktor Orban.

“Hungaria në vitin 2021, nën udhëheqjen tuaj, është sërish në ballë të luftës për lirinë e popujve”, tha Le Pen në një konferencë të përbashkët për shtyp me Orban.

“Në këtë muaj tetor, momenti dhe rrethanat mund të na frymëzojnë vetëm të mendojmë me dashuri për heronjtë e kryengritjes së 1956,” tha ajo, duke iu referuar revoltës kundër regjimit komunist të mbështetur nga sovjetikët në Hungari.

Le Pen përshëndeti “guximin” dhe “vendosmërinë” e Orban dhe premtoi se nëse ajo zgjidhet presidente vitin e ardhshëm, Franca do të mbështesë një “riorientim” të Bashkimit Evropian “brutaliteti ideologjik i të cilit kërcënon vetë idenë e sovranitetit”.

Udhëheqësja franceze e ekstremit të djathtë refuzoi të kritikonte një ligj hungarez anti-LGBT që është në qendër të një grindjeje ligjore me Brukselin.

Ajo hodhi poshtë gjithashtu idenë se ligji i BE-së duhet të gëzojë ndonjë përparësi ndaj ligjeve kombëtare.

Gjykata Kushtetuese në Poloninë anëtare të BE-së këtë muaj sfidoi përparësinë e ligjit të BE-së mbi ligjin polak duke deklaruar disa nene në traktatet e BE-së “të papajtueshme” me kushtetutën e vendit.

Hungaria ka hedhur peshën e saj pas vendimit polak, duke i kërkuar bllokut të respektojë sovranitetin e anëtarëve.

Le Pen foli të martën për një “pushtet të centralizuar të Brukselit të dehur me ekzistencën e tij, fuqinë dhe gjithëfuqinë e tij”.

Kërcënimet e BE-së për sanksione kundër Budapestit dhe Varshavës “janë jashtëzakonisht të dhunshme”, shtoi ajo.