Fondi Ndërkombëtar për Ukrainën do t’i sigurojë Kievit pajisje me vlerë mbi 200 milionë funte (mbi 240 milionë dollarë) për të përmirësuar aftësitë e saj, njoftoi Ministria e Mbrojtjes e Mbretërisë së Bashkuar.

“Ukraina do të marrë kapacitete me vlerë miliona, duke përfshirë rezerva tankesh, sisteme ajrore pa ekuipazh dhe mbrojtje ajrore”, tha ministria në një deklaratë.

Paketa e parë e pajisjeve u ra dakord nga Mbretëria e Bashkuar, Holanda, Norvegjia, Suedia dhe Danimarka, të cilët së bashku me Islandën dhe Lituaninë, kanë kontribuar në një total prej më shumë se 520 milionë funte, thuhet në deklaratë.

“Me një vlerë të pritshme prej më shumë se 200 milionë funte, paketa e parë do të përfshijë aftësi jetike në formën e municioneve artilerie, inteligjencës detare, vëzhgimit dhe zbulimit, si dhe pjesë këmbimi për pajisje, duke përfshirë tanket aktuale të Ukrainës”, shtoi ministria.

Sekretari britanik i Mbrojtjes Ben Wallace tha se paketa do të sigurojë një “rritje të konsiderueshme të aftësive” për ushtrinë ukrainase dhe “aftësinë e tyre për të mbrojtur vendin e tyre”.

“Fondi Ndërkombëtar për Ukrainën i udhëhequr nga Britania e Madhe demonstron përkushtimin e Mbretërisë së Bashkuar dhe aleatëve tanë për të siguruar që Ukraina të marrë ndihmën jetike ushtarake të nevojshme për t’u mbrojtur kundër pushtimit të paligjshëm të Rusisë”, tha ai.