Ministri i Jashtëm rus Sergej Lavrov pretendoi të premten se BE dhe NATO po mbledhin një “koalicion” për t’u përgatitur “në thelb” për një luftë me Rusinë.

Duke komentuar anëtarësimin e Ukrainës dhe Moldavisë në BE, Lavrov tha se BE-ja nuk është një bllok ushtarako-politik, prandaj, ndryshe nga NATO, zhvillimi i marrëdhënieve të saj me vendet e tjera nuk krijon ndonjë kërcënim apo rrezik për Rusinë.

Megjithatë, Rusia e percepton se retorika e bashkimit kishte qenë gjithnjë e më agresive dhe “rusofobike”, tha Lavrov në një konferencë të përbashkët shtypi me homologun e tij azerbajxhanas Jeyhun Bayramov në Baku.

Bashkimi Evropian, së bashku me NATO-n, po mbledh një lloj koalicioni modern për të luftuar, në thelb, një luftë me Federatën Ruse”, tha Lavrov, duke shtuar se Rusia do ta “monitorojë këtë nga shumë afër”.

Këshilli Evropian i dha Ukrainës dhe Moldavisë statusin e vendit kandidat në BE të enjten në një përpjekje për të treguar mbështetje për të dy vendet përballë agresionit rus kundër Ukrainës.

Çështja e anëtarësimit të Ukrainës dhe Moldavisë në BE u etiketua “çështje e brendshme evropiane” nga zëdhënësi i Kremlinit Dmitry Peskov, gjithashtu të premten. Megjithatë, ai shtoi se është thelbësore që një vendim për këtë çështje të mos ndikojë më tej në marrëdhëniet e Rusisë me dy vendet apo bllokun evropian.

“Këto janë, natyrisht, çështje të brendshme evropiane,” u tha Peskov gazetarëve në një konferencë të rregullt.

Megjithatë ai shtoi: “Për ne është thelbësore që të gjitha këto procese të mos sjellin më shumë probleme tek ne dhe në marrëdhëniet e vendeve të lartpërmendura me ne. Dhe se kjo nuk çon në një përkeqësim të mëtejshëm të marrëdhënieve tona me BE-në.”
Komentet e Peskov i bëjnë jehonë fjalëve të presidentit rus Vladimir Putin i cili tha të premten e kaluar se Rusia “nuk ka asgjë kundër” hyrjes së Ukrainës në BE pasi është “vendimi sovran i çdo vendi” për t’u bashkuar me një bllok ekonomik.