Ukrainasit në qytetet bregdetare kanë festuar lajmin se luftanija kryesore ruse në Detin e Zi është dëmtuar rëndë nga zjarri dhe ekuipazhi i saj është detyruar të evakuohet.

Përdoruesit e Twitter kanë ndarë meme ngazëllyese. Shumë prej tyre kanë përdorur një imazh të një pulle speciale të lëshuar nga shërbimi postar i Ukrainës, që përshkruante një moment famëkeq në fillim të luftës, trupat që mbronin ishullin e gjarpërinjve, dërguan me radio një mesazh për Moskën, i cili përkthehej lirshëm si “shko në ferr”.

Lajmi për incidentin fillimisht dukej “shumë i mirë për të qenë i vërtetë”, thotë Olga Grynko, 39 vjeç, nga Odesa. “Ndonjëherë ata [autoritetet] i ekzagjerojnë gjërat vetëm për të na gjallëruar,” tha ajo.

Odesa është vetëm një nga qytetet bregdetare që Moska e ka kërcënuar gjatë pushtimit rus.

Olga e konsideron zjarrin një fitore simbolike, duke shtuar: “Anija quhet Moskë, dhe ideja që Moska po digjet është kaq e bukur”.

Por ajo thotë se është e pazakontë që ukrainasit të dëshirojnë dëm për të tjerët. “Ne zakonisht nuk jemi të tillë. Por nëse këta njerëz vijnë të na vrasin, ne u urojmë atyre më të keqen, siç mund ta imagjinoni.”

Anna Lisnyak, 42, gjithashtu nga Odesa, pati një reagim të ngjashëm. “U ndjeva e lumtur, nëse mund të them kështu”, tha ajo.

“Unë mendoj se ju mund ta imagjinoni se si ka qenë, duke dëgjuar për anijet luftarake ruse që lundrojnë afër.”

Megjithëse Odesa nuk ka dëshmuar të njëjtën egërsi luftimesh si Mykolaiv, më në lindje, Anna tha se ka jetuar në një gjendje frike. Një fabrikë e përpunimit të naftës pranë shtëpisë së saj u granatua javën e kaluar.