Zëvendëskryetari i LSI-së Luan Rama i ftuar në rubrikën “Opinion” në News24 ka komentuar protestën e banorëve të zonës së Astirit, të cilët kundërshtojnë vendimin për të prishur ndërtesat  pa marrë më parë dëmshpërblimet.

Sipas tij, LSI-ja mbështet në shenjë solidariteti qytetarët në kauzën e tyre, sepse ata janë në të drejtën legjitime të tyre, pasi në atë zonë nuk ka një leje për të ndërtuar.

Ai foli edhe për mungesën e dialogut politik, reformën në drejtësi, por pa harruar edhe qëndrimet e maxchorancës, e cila sipas tij po krijon kosto të madhe për rrugën europiane të vendit.

Gjithashtu në fjalën e tij, Luan Rama bëri një deklaratë të fortë ku iu bën thirrje qytetarëve të vijnë dhe të nxjerrin deputetët nga Kuvendi, pa dallim nga ngjyrat partiake me qëllim zgjedhjen e qeveritarëve të duhur.

“Në protestë tek Unaza e Re në formë solidariteti me qytetarët. Mirë do ishte të ishte tek ata edhe deputetët e mazhorancës. Unë jam pro përmirësimit, zhvillimeve infrastrukturore. Në rastin konkret jemi përballë një arbitrariteti.Shteti nuk po ndjek standartet ligjore, pse iu kërkon qytetarëve të respektojnë këto standarde ku qeveria nuk i zbaton. Kemi në prapavijë interesa korruptive në këtë zonë.

Nëse jemi në një fazë, e cila nuk ka një leje ndërtimi. Duhet të dëmshpërblehen paraprakisht, ky është një detyrim ligjore. Të dëmshpërblehen për dëmin që iu shkaktohet. T’ju jepet shuma që mund të marrin më pas një shtëpi tjetër. Kemi vetë kryeministrin i cili do të deklaronte  më parë se nuk do të prishen shtëpitë. Askush nuk është kundër ligjin, sjellja, qasja dhe praktika.”, tha Rama.

Ai tha se banorët janë vetë ata që do të mbrojnë kauzën e tyre. “Ne jemi solidarizuar me ta. Mbështetje ligjore, por edhe mbështetje  në të gjitha institucionet, jo vetëm brenda, por edhe jashtë vendit”, tha Luan Rama.

Sipas tij “Injoranca dhe Arroganca e kanë verbuar këtë mazhorancë. Dëmin  më të madh po ia bëjnë vendit, ata anatemojë opozitën. Dialogu politik është një kusht i BE. Nuk preferoj të bëj komente për apelin e Presidentit, dëshiroj të pres  mesazhe. Do të duhet që edhe presidenti të shohë situatën , sepse ne nuk mund të bashkëpunojmë me elementë kriminalë”.

“Organet e reja të drejtësisë janë një listë me standarde. Komisioni i Venecias është bërë si anije shpëtimi, sepse politika kur bëhet  me shumë vrima thërret  Venecian për ta shpëtuar. Ne jemi të gatshëm dhe ne presim reflektimin dhe përgjegjshmëri e mazhorancë, për mënyrën se si po sillet po krijon kosto të madhe për Integrimin  vendit.  Qytetarët duhet të vijnë të nxjerrin jashtë deputetët nga parlamentin dhe të zgjedhin  ata që mendojnë se janë të duhurit”, shtoi mes tjerash Luan Rama.

Intervista e Zëvendës Kryetarit të LSI-së, Luan Rama për News 24

Si do t’i mbështesni më tej banorët e “Unazës së Re”?
Prania në protestë është shenja më e dukshme e solidaritetit me atë bashkësi qytetarësh që gjenden atje të rrezikuar përballë arbitraritetin, injorancës dhe korrupsionit qeverisës. Do duhej ne fakt që aty të ishin të pranishëm dhe deputetët e maxhorancës, siç kanë bërë në raste të ngjashme kur ata ishin në opozitë. Sepse solidariteti me qytetarët nuk është konstante qëndrimesh vetëm e opozitës kur qytetarët kanë të drejtë, por nëse je deputet i popullit dhe nëse je i fokusuar te shqetësimet qe kanë qytetarët, streha politike nuk mund të jetë pengesë për të qenë pranë  tyre.

Natyrisht unë jam pro ndryshimeve, pro zhvillimit infrastrukturor edhe të qytetit të Tiranës dhe të të gjithë vendit, sepse në fund të fundit qeverisja ka nevojë të shfaqë produktivitetin e saj. Dhe produkti është i dukshëm edhe në infrastrukturë. Mirëpo në këtë rast kemi përballë arbitraritetin, sepse kur shteti nuk zbaton detyrimet ligjore, kur nuk ndjek të gjitha hapat që duhet të ndjekë çdo subjekt si në rastin konkret, nuk mund të jetë i favorizuar ne investimin që do kryejë, në dëm të pronës private të qytetarëve.

Atëherë pse duhet t’u kërkojmë qytetarëve të ndjekin standardet ligjore kur shteti nuk i ndjek këto standarde. Në rastin konkret nuk është marrë leje e ndërtimit, nuk është bërë transparenca e gjithë procesit, nuk ka një proces dialogu dhe bashkëpunimi me qytetarët, për t’i sqaruar dhe për t’i bindur ata për domosdoshmërinë e investimit që duhet kryer. Dhe për të gjetur zgjidhjen që çon te pranimi i ofertës që do të bëjë qeveria, për të kompensuar dëmin që iu shkaktohet.

Nga ana tjetër kemi gjithashtu në prapavijë interesat korruptive që lidhen me këtë investim, i cili paradoksalisht zhvillohet në një zonë që jo më shpejt se para dy vitesh janë bërë investime aty. Dhe kjo gjë mund të bëhej që në kohën kur bëhej mbikalimi, por edhe pasi u bë mbikalimi në zonën mes Pallatit me Shigjeta që quhet si një target adrese e zonës, e cila do të preket nga investimi. Gjithashtu janë bërë investime në infrastrukturë me zgjerimin e rrugës, etj, gjë që do të thotë ai investim ka qenë i pastudiuar ose i pa harmornizuar me projektin tërësor të studimit dhe nga ana tjetër qytetarët lihen në mëshirë të fatit, në mëshirë të arbitraritetit dhe arrogancës së qeverisë, pa u dhënë atyre dhe pa mbrojtur tek ta standardet ligjore që duhet të aplikojë në fakt një shtet.

Kur thuhet që do lihen në mëshirë të fatit z. Rama, çfarë keni parasysh? Sepse këtyre banorëve u është thënë që ju do të dëmshpërbleheni, ndërsa të tjerëve që nuk janë në banesa të legalizuara, do t’u paguhet një qira për një afat të caktuar kohor derisa ju të gjeni një strehim…
Kujt? Si? dhe Çfarë? Sepse edhe kështu siç është thënë, është një mungesë serioziteti nga ana e qeverisë, sepse nëse jemi në fazën kur aty ka një projekt, por të pa miratuar sipas procedurave që miratohet një projekt investimesh, pra nuk ka një leje ndërtimi dhe për sa kohë që ligji thotë që pa lejen e ndërtimit nuk mund të cenosh pronën e tjetrit, ashtu sikundër ligji thotë që u duhen dhënë paratë personave që preken, pastaj t’ua prishësh shtëpinë, këto janë detyrime ligjore.

Pra ju po thoni që duhen të dëmshpërblehen përpara se të largohen?
Po sigurisht, siç e kërkon ligji nuk është çështja që e them unë, nuk është çështja se e kërkojnë qytetarët këtë gjë. Ky është një detyrim ligjor.

Qytetarët këtë kërkojnë, janë skeptikë në këtë drejtim.
Nuk e kërkojnë se iu është tekur atyre ta kërkojnë këtë gjë. Ky është një kusht ligjor. Në momentin që ti ke vendosur, është miratuar projekti, është marrë leja e ndërtimit, do të fillojë investimi, atëherë duhet t’u japësh paratë qytetarëve në mënyrë të atillë që, e para të dëmshpërblehen për dëmin që iu është shkaktuar, e dyta që t’ju jepet ajo vlerë që ata pasi humbasin shtëpinë për shkak të këtij investimi, të mund të marrin një shtëpi tjetër dhe e gjitha kjo duhet bërë përpara se të fillojë prishja e çdo pëllëmbe mur apo investimi që është bërë atje me apo pa leje.

Sepse edhe kjo çështja që janë ndërtime pa leje ha diskutim, për sa kohë ti ke 27 vjet, kur them ti, kam parasysh shtetin dhe shteti nuk është qeveria vetëm.

Pra ka 27 vjet që ata janë lejuar të ndërtojnë aty, janë legalizuar de facto, sepse është pranuar investimi që ato kanë bërë, ligji herë pas here ka ndryshuar për të fituar kohë dhe afate që ato të mund të legalizohen dhe për sa kohë ti ke krijuar këtë model të qeverisjes, ku rasti më flagrant është deklarata e kryeministrit të zgjedhjet e 2013 tek i njëjti vend, tek të njëjtët banorë, të cilëve iu thotë që shtëpitë nuk prishen, sepse janë investime djerse dhe gjaku, ç’ka ishte në harmonizim me sloganin “Legalizim dhe urbanizim”, të artikuluar në atë kohë nga kryeministri, që do të thotë, e gjitha kjo e ka legalizuar “de facto” realitetin e krijuar.

Prandaj nuk mund të veprosh me forcën e shtetit dhe me arbitraritetin e shtetit në dëm të qytetarëve dhe ç’është më e rëndësishmja në kundërshtim me ligjin. Nëse ligji ta jep këtë tagër dhe këtë mundësi dhe këtë autoritet, askush nuk është kundër ligjit. Por sjellja, qasja dhe praktika që qeveria po kërkon të aplikohet atje, është tërësisht në kundërshtim me ligjin.

Si do ta mbroni ju kauzën e këtyre banorëve? Si do t’i mbroni ju këta banorë, përveçse duke iu qëndruar pranë në protesta?
Jam i bindur që, e para banorët do ta mbrojnë vetë kauzën e tyre, sepse këtu nuk është çështja se çfarë do të bëjmë ne për t’i mbrojtur ata. Ne jemi solidarizuar me ta edhe për t’i inkurajuar ata në revoltën, në të drejtën e tyre, sepse përballë kanë paligjshmërinë e shtetit dhe përsa kohë që shteti sillet si rrugaç përballë qytetarëve, ata kanë të drejtë të mbrojnë pronën.

Kam përshtypjen që nuk kanë nevojë vetëm për kaq z. Rama. Kanë nevojë t’i ndihmoni konkretisht. Ata nuk duan të largohen nga shtëpitë e tyre…

Padyshim! E gjithë asistenca jonë nuk është vetëm solidaritet me ta, por edhe mbështetje ligjore, edhe mbështetje në të gjitha institucione ku ligji krijon hapësira dhe mundësinë për ta trajtuar problemin e tyre, jo vetëm brenda vendit, por deri në instancat më të larta të vendimmarrjes në institucionet ligjore ndërkombëtare.

A mos duhet ta ngrini zërin edhe në Kuvendin e Shqipërisë për këtë çështje z. Rama?
Është një çështje që ha diskutim edhe kjo çështja e zërit në Kuvend, por sa vlerë do të kishte zëri ynë në mbrojtje të qytetarëve në Kuvend në të njëjtin kor dhe brenda së njëjtës hapësirë ku dominon zëri kriminal, zëri i korrupsionit, i arbitraritetit dhe i injorancës së mazhorancës.

Sepse nuk e thotë kot populli; atje ku nuk të pyesin dhe atje ku nuk të dëgjojnë as mos shko dhe as mos fol.

Mazhoranca e verbuar nga arroganca e vet dhe nga injoranca, sepse arroganca dhe injoranca janë një binom i mishëruar më së miri në gjithë modelin qeverisës së kësaj mazhorance, nuk e kupton që nuk po i bën dëm vetëm vetes së saj, por dëmin më të madh po ia shkakton vendit, dëmin më të madh po ia bën tërësisht procesit të integrimit evropian të vendit, kushti i parë i së cilës është dialogu politik. Për sa kohë ata nuk janë të gatshëm dhe provokojnë, fyejnë, anatemojnë opozitën për shkak të injorancës dhe arrogancës së tyre, atëherë nuk ka vend për t’u bërë pjesë e të njëjtit sfond, i cili është i ngjashëm me ato marionetat apo me kukullat e Teatrit të Kukullave, ata janë fasada, por fishat, telat për të komanduar këta manekinë i kanë të tjerë instrumenta, që nuk kanë të bëjnë me politikën, nuk kanë të bëjnë me qeverisjen e mirë, nuk kanë të bëjnë me zbatimin e ligjit.

Dhe siç po dëshmohet dhe siç do të dëshmohet edhe më tej, janë të instrumentalizuar nga prapavija kriminale, që për fat të keq e dominon tërë sjelljen politike të maxhorancës.

Duket se nuk e mendon kështu Presidenti Republikës z.Meta, i cili i ka bërë thirrje opozitës që të shkojë në parlament dhe t’i parashtrojë dhe diskutojë aty kërkesat që ka apo të mbrojë kauzat e caktuara që ka. Si i përgjigjeni apelit të Presidentit Meta?
Nuk preferoj të bëj komente për apelin e Presidentit, por dua të theksoj se më parë se ftesa që opozita të shkojë të artikulojë qëndrimet e veta në parlament, do të duhej që edhe Presidenti të shikonte më drejtpërdrejtë situatën kriminale në vend dhe të mos na ftojë ne të shkojmë të bëhemi sfondi i të njëjtit kor kriminal në parlament.

Parlamenti është një tempull ku qytetarët na kanë zgjedhur për t’i përfaqësuar, por nuk na kanë zgjedhur për të bashkëjetuar me elementë kriminal brenda këtij parlamenti, dhe kjo e bën gjithmonë e më të rëndësishëm edhe aksionin e Vetting-ut politik, i cili nuk është një trill vjeshte i opozitës, por është standardi që ne kemi aplikuar me Vetting-un në organet e drejtësisë dhe në Vetting-un në polici, pavarësisht se në vlerësimin tim personal është i tëri një absurd, një absurd ligjor dhe kushtetutës, sepse parimisht është ndërtuar mbi shkeljen e të drejtave të njeriut, shkeljen e standardeve bazë të demokracisë mbi të cilën funksionon një shtet normal i së drejtës në të gjithë botën demokratike. Por, për shkak të këtij paradoksi, nuk mund të aplikojmë dy standarde, një standard për policin dhe një standard për ministrin, një standard për gjykatësin dhe prokurorin dhe një standard ndryshe për ata që votojnë dhe zgjedhin, emërojnë dhe monitorojnë strukturat e organeve të drejtësisë.

Boll t’ju them që edhe në përbërje të komisioneve apo të trupave të institucioneve të drejtësisë dhe të Vetting-ut, për shkak të një vote poltike dhe të papërgjegjshme të individëve dhe të maxhorancës, rezulton të jenë zgjedhur njerëz pa kredencialet e duhura të integritetit, pa kredencialet e duhura të profesionalizmit dhe pa standardet që kërkon zbatimi dhe aplikimi i Reformës në Drejtësi, në paanshmëri dhe vetëm në zbatim të ligjit, dhe të pa ndikuar nga interferenca politike, gjë që për fat të keq nuk po ndodh.

Më lejoni t’ju them një rast të djeshëm; diku lexova apo pashë listën që ka paraqitur për në këtë organet e drejtësisë, Prokuroria e Përgjithshme, një listë me 2 emra që kanë shkollën e Magjistaturës dhe një listë tjetër që nuk e kanë shkollën e Magjistraturës, për të cilën Prokurorja e Përgjithshme thotë se këta i plotësojnë kriteret, por nuk kanë shkollën e magjistraturës! Mirëpo shkolla e magjistraturës është njëri nga kriteret, si mund të thuash i plotësojnë kriteret dhe nuk kanë shkollën e Magjistraturës, kur shkolla e Magjistraturës është kriteri i pa negociueshëm i ligjit.

Pra paradokse të kësaj natyre janë alarmante dhe realiteti në fakt është akuzuesi më i rëndë dhe më i paanshëm i situatës paradoksale në të cilën gjenden institucionet e shtetit, në të cilat gjenden institucionet e drejtësisë!Ketë ua thashë edhe në takimin që patëm me delegacionin e Komisionit të Venecias, të vilët i pyeta; meqë jeni juristë më thoni çdo të thotë që një vend nuk ka Gjykatë Kushtetuese? Më thoni çdo të thotë që një vend nuk ka Gjykatë të Lartë, më thoni çdo të thotë që një vend që i ka institucionet e drejtësisë në kolaps për shkak të papërgjegjshmërisë së maxhorancës në qasjen apo në sjelljen ndaj reformës në drejtësi?!

As ata nuk dinë të përgjigjen, sepse ata dhe Bashkimi Europian, edhe Komsioneri Hann, edhe Mogherini pa folur për eurodeputetët që vijnë këtu dhe bëjnë tamtame dhe duartrokasin, janë përgjegjës për situatën e krijuar! Ndaj askush nuk di të thotë se çfarë do të bëhet në vendin tonë me organet më të larta të sistemit të drejtësisë.

Gjithsesi, z. Rama a është për ju opinioni i Komisionit të Venecias, po ju flas për Lëvizjen Socialiste për Integrim tabani i demokracisë dhe a ishin për ju të mirëseardhur…
Të thuash se Komisioni i Venecias është tabani i demokracisë, do të thotë të jesh injorant politik dhe të mos kuptosh çdo të thotë shoqëri demokratike, çdo të thotë zgjedhje demokratike në një vend demokratik dhe çdo të thotë verdikt të popullit në mënyrë demokratike.

Tabani i demokracisë është vota e lirë dhe demokratike e qytetarëve. Por një maxhorancë që e vjedh këtë votë, që e manipulon këtë votë, që e kriminalizon këtë votë, natyrisht do të thotë “tabani i demokracisë është Komisioni i Venecias”.

Komisioni i Venecias është një trupë prestigjioze natyrisht. Është një institucion me kontribute të mëdha dhe të vlerësuara edhe për konstitucionalizmin në Shqipëri, edhe për kuktivimin nder ne të  frymës dhe kulturës  së zbatimit  të Kushtetutës, të ligjit dhe parimeve të demokracisë, por një institucion nuk mund të jetë tabani i demokracisë. Kështu që mos më referoni ju lutem shprehje injorantësh që nuk e kanë idenë se ku qëndron tabani i demokracisë.

A ishte Komisioni i Venecias i mirëpritur prej jush?
Padyshim, jo vetëm Komisioni i Venecias, por çdo trupë, çdo institucion i çdo niveli qoftë që vjen në Shqipëri për të njohur situatën dhe për të diskutuar mbi sfidat që përballon shoqëria shqiptare, por edhe mbi problemet që ka ajo, mbi paradokset që ka krijuar ky vend, sigurisht që është i mirëpritur. Madje unë e thashë dje diku që Komisioni i Venecias është bërë si një anije shpëtimi, pasi politika në vend, pra pasi politika jone anijen me të cilën udhëton e shkatërron e bën tërë vrima, e zhyt në ujë dhe momentin kur është duke u mbytur atëherë ftojmë Komisionin e Venecias që të na shpëtojë.

Përgjegjësia dhe papërgjegjshmëria janë brenda nesh, brenda klasës politike shqiptare dhe natyrisht në këtë situatë përgjegjësinë më të madhe e mban maxhoranca, e cila është garantë e qeverisjes së mirë të vendit dhe qeverisjes në zbatim të ligjit.

Mund të mos kemi pika takimi apo mund të mos ndajmë vlerësime të njëjta me maxhorancën kur është fjala çështje për çështje që ka të bëjë me qeverisjen, por kur është fjala për qeverisjen e mirë dhe zbatimin e ligjit nuk ka pse të ketë diferenca në qëndrime.

Por për sa kohë papërgjegjshmëria, arroganca dhe injoranca janë bërë bashkë atëherë produkti do të jetë konflikt me qytetarët, konflikt me ligjin dhe konflikt me të ardhmen evropiane të vendit.

Më sa kuptova unë nga kjo bisedë z. Rama edhe ju nuk do të jeni prezent edhe në këtë seancë të së enjtes në Parlament?
Ne jemi të gatshëm dhe ajo që presim është reflektimi dhe përgjegjshmëria e maxhorancës për të kuptuar që vetëm, në mënyrën sesi po sillet do të shkojë në asgjëkund dhe po krijon kosto të mëdha për integrimin evropian të vendit. Sepse edhe njëherë po e përsëris, ata jo që nuk e dinë, ata e krijojnë enkas këtë situatë për të abuzuar, siç kanë bërë edhe me moskrijimin e Gjykatës Kushtetuese. Iu duhet që të mos jetë Gjykata Kushtetuese që konfliktin me qytetarët, edhe për pronën si në rastin konkret tek zona e Astirit, e kanë stisur dhe ndaj nxitojnë ta bëjnë fakt që të mos ketë mundësi të shprehet Gjykata Kushtetuese.

Ashtu siç u krijua problemi idiot në konfliktin që u krijua mes institucionit të Kryeministrit dhe të Presidentit për dekretimin e ministrit të brendshëm, i cili ishte një konflikt i hapur dhe i pastër kushtetues, por që nuk mund të zgjidhej në Gjykatën Kushtetuese, për shkak të bllokimit të saj, dhe u zgjidh me një model shqiptar. Në momentin e fundit u çua kërkesa për të dekretuar lirimin nga detyra si ushtarak e kandidatit për ministër, i cili formalisht pas dekretimit nga ana e Presidentit plotësoi kriterin për t’u emëruar si ministër.

Por ai ka qëndruar 2 javë në detyrë si zëvendësministër, duke qenë edhe ushtarak. Dekreti i Presidentit nuk ka fuqi prapavepruese, që do të thotë se Dekreti nuk e zbardh pjesën para emërimit të tij si ministër. Pra nga momenti i emërimit të tij si zëvendësministër dhe deri në momentin e dekretimit për lirimin nga detyra si ushtarak, ai ka qenë në kundërshtim me ligjin praktikisht. Pra kemi të bëjmë me një shkelje nga ana e qeverisë, të cilën nuk mund ta trajtojë Gjykata Kushtetuese, sepse nuk është. Sepse po ta çosh në Gjykatë Kushtetuese, edhe sikur të gjithë gjyqtarët t’i emërojë nga kjo maxhorancë, ata nuk mund të thonë që e bardha është e zezë apo e zeza është e bardhë.

Në fund të ditës viktimë e historisë mbeten banorët. Në këtë rast banorët e Astirit ku çdo qeveri ka premtuar legalizim dhe asnjë s’ia ka bërë. Çdo qeveri e kam fjalën?
Viktima gjithmonë janë qytetarët. Natyrisht nuk po e ndaj në periudha. Qeverisja e Shqipërisë ka krijuar kosto të njëpasnjëshme, vit pas viti, qeveri pas qeverie mbi qytetarët. Atëherë në këtë realitet papërgjegjshmërie çfarë duhet të ndodhë? Në këtë realitet papërgjegjshmërie qytetarët duhet t’i dalin zot vetes dhe të marrin në dorë fatet e tyre. Unë e kam thënë dhe nuk hezitoj ta them dhe këtu: qytetarët duhet të vijnë dhe ta përzënë Parlamentin jashtë asaj salle nga i pari deri te i 140, pa përjashtuar askënd. Ta përzënë Parlamentin, ta përzënë qeverinë dhe të zgjedhin qeverinë që ata mendojnë se u shërben atyre. Kjo qeveri dhe ky model qeverisjeje është qeverisje në kundërshtim me interesat e qytetarëve, në kundërshtim me interesat evropiane të vendit.

(n.m/BalkanWeb)