Rikthehet në emisionin “Me Zemër të Hapur”, në News24, historia e trishtë e familjes Çufe. Pas apelit të nënës Jaze Çufe, e cila dy ditë më parë rrëfeu në studion e emisionit “Me Zemër të Hapur” jetën e vështirë me djalin dhe nusen, ka reaguar kjo e fundit.

Dallëndyshe Dervishi është 38 vjeçe dhe jeton prej disa vitesh në Vlorë me dy fëmijët dhe bashkëshortin, i cili vuan nga Hepatiti. Në një lidhje skype, nusja tregoi versionin e saj të njohjes më familjen Çufe, martesën me Anxhelon dhe bashkëjetesën e vështirë në një çati me vjehrrën. Ajo thotë se është martuar me shkesë, përmes vjehrrit të saj, por i mbajnë të fshehtë sëmundjen e djalit.

Këtë të vërtetë 38-vjeçarja e mëson pas gjashtë muajsh martesë dhe të gjitha kursimet e vajzërisë i përdor për kurimin e burrit. Ajo thotë se ka marrëdhënie të mira me burrin, por sëmundja e ka bërë shumë të vështirë jetesën e çiftit, ndërsa vjehrra, sipas saj, vetëm provokonte konflikte. Vjehrra dhe nusja u përballën “live” në emision, ku ndërhyri dhe djali, i cili iu lut të ëmës t’i lërë të qetë, pasi ai dhe bashkëshortja shkojnë shumë mirë.

Përplasja live:
Vjehrra: Unë respektin ja kam bërë me të gjitha. Ajo nuk i pranon të vërtetat, por është një Zot i madh që shikon dhe gjykon. Marrëdhënia është krisur për arsye se kjo pretendon se dua t’i marr shtëpinë, por kjo nuk është e vërtetë. Unë nuk e kam shprehur një dëshirë të tillë. Atë e bezdis shumë prezenca ime, por unë e kam djalin të sëmurë.

Nusja: Nuk është aspak e vërtetë.
Vjehrra: Nuk dua të jetoj më me nusen, dua të dal me burrin tim, që kam kaq vite që e humbas. Unë e kam djalin shumë sëmurë. Ajo bërtet, dëgjon gjithë lagjja, më ka bërë dhunë në lagje. Ta thotë pse u thye marrëdhënia jona, ta thotë që bëri këtë e atë dhe unë e fal me shpirt. Ajo nuk më donte në shtëpi, nuk më lë të jeton në shtëpi. Ata të shikojnë jetën e tyre se kam 11 vite që e duroj.

Nusja: Edhe unë kam shumë hall të madh, së pari kam bashkëshortin që unë e di si flej e gdhihem me të. E di unë si i kaloj netët me burrin tim. Unë e dua shumë burrin, shes edhe mëlçinë për të. Vjehrra ka 11 vite që jeton në Greqi. Ajo le të kthehet në shtëpi, se është e saja. Asnjëherë në botë nuk do ta provokoj, apo të ngre zërin. Por edhe unë nuk dua të provokohem, sepse edhe unë kam gjak. U nisa më shumë se 1 vit e gjysmë në Gjermani, vjehrra ishte në Greqi dhe burrin e saj e lashë në shtëpi. Pse s’u kthye ajo në Shqipëri të qëndronte me të. Ajo mund të kthehet kur të dojë në shtëpinë e saj.

Vjehrra: Nuk më linte të përkëdhelja fëmijët. E çoi vajzën në Tiranë, edhe pse qante nga mëngjesi deri në darkë.
Nusja: Nuk është e vërtetë, upupupu çfarë janë këto.
Vjehrra: E mbyll vajzën me çelës në dhomë.
Nusja: Po ti harron ç’ke bërë.

Vjehrra: Unë i dua fëmijët të gjithë njësoj, edhe nuset, që të kalojmë të gjithë bashkë në harmoni. Unë jam shumë e zonja t’i bëj bashkë fëmijët, por tani e tutje nuk mundem, sepse ajo do fillojë prapë të sajat.
Nusja: Zonja mund të kthehet në shtëpinë e saj, nuk jam unë pengesa, arsyet e saj nuk i di. Mos të thotë se më provokon nusja. Mos të thotë se nuk kam punuar, kemi punuar edhe unë, edhe burri. Kur ajo ishte në Shqipëri na ndau ushqimin, tha që ti do gatuash mënjanë, unë në anën tjetër, dhe ne do hamë në tavolinë secila gjellën e vet. Ne i thamë nëse na ndave ushqimin, na ndaj dhe shtëpinë. Këtu kanë krisur debatet. Nuk është e vërtetë që na ka mbajtur ajo dhe ne nuk kemi punuar.

Anxhelo, djali: Shkaku ka qenë se mamaja ime na ka ndarë ushqimin dhe më tha ‘dil jashtë nga shtëpia’. Këtë e dinë të gjithë njerëzit. Më tha që të largohem nga shtëpia. Po i thashë “ku të shkoj, në rrugë?” Më tha “nuk më intereson”. Njerëzit tanë e dinë shumë mirë këtë gjë. I lutem shumë, unë me bashkëshorten kaloj shumë mirë, po të mos kisha këtë grua, nuk do të isha sot e kësaj dite.

Vjehrra (nëna e Anxhelos): Ti u ngrite të më qëlloje me grushte.
Djali: Nëna ime nuk e do nusen time, arsyeja është shumë e vështirë. E kam marrë në telefon dje mbi 20 herë dhe nuk ma ka ngritur telefonin. I lutem të më lërë të qetë të jetoj me familjen time. Që sot ajo le të vijë te shtëpia jonë, edhe bashkëshortja ime është dakord.

Vjehrra: Këtë vit po punoj për veten time, sepse jam në prag të pensionit. Do rikthehem në banesë në fund të muajit maj. Unë kërkoj që ata të jetojnë larg meje dhe unë të futem në shtëpi. Kam një dhomë përjashta, dhomë e kuzhinë, Anxhelo të dalë e të jetojë aty.
Djali: Unë nuk e pranoj atë që thotë nëna ime. Unë kam dhomën time, kam ikur 14 vjeç në Greqi dhe kam punuar për këtë shtëpi.

(d.ç./BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb