Uragani Eta që ka goditur shtatë vende të Amerikës Qendrore ka shkaktuar deri tani 200 të vdekur dhe të zhdukur. Stuhia ka qenë shumë e fuqishme dhe tani do të rrisë sërish fuqinë e saj teksa drejtohet në Ishullin Cayman, Kubë dhe më pas në Florida. Ndër të tjera numri i viktimave vazhdon të rritet në Guatemalë, vendi më i goditur nga Uragani.
Fshati i Queja (në veri) është përfshirë pothuajse i tërë nga balta dhe presidenti i vendit Alejandro Giammattei ka pranuar që bëhet fjalë për rreth 150 të vdekur dhe disa të humbur.
Të enjten forcat e ndihmës së shpejtë nuk kanë arritur të hyjnë në zonë për shkak të rrugëve të përmbytura. Forcat e ushtrisë kanë mbërritur dje në fshat për të kërkuar për persona të mbijetuar. Uragani ka prekur tokën të martën në brigjet e Karaibeve të Nikaraguas, kur stuhia ishte e kategorisë 4, me erëra deri në 140km/orë por është dobësuar gjatë kalimit të saj në Nikaragua dhe Honduras. Shirat e furishëm kanë goditur edhe brigjet e Costa Rikës, Panamasë, El Salvador, si dhe Meksikën, ku autoritetet e Chiapas, një nga shtetet më të varfra të Vendit-kanë njoftuar gjetjen e të paktën 20 viktimave. Sipas qendrës së monitorimit të uraganeve amerikane (Nhc), Eta do të godasë Kubën nesër, duke vazhduar më pas rrugën drejt Floridas së Jugut.
