Hungaria thotë se nuk do ta arrestonte presidentin rus Vladimir Putin, nëse ai do të hynte në vend, pavarësisht se Gjykata Ndërkombëtare Penale (ICC) lëshoi një urdhër arresti për të javën e kaluar, duke e akuzuar atë për dëbimin e paligjshëm të qindra fëmijëve nga Ukraina.
Shefi i shtabit të kryeministrit hungarez Viktor Orban, Gergely Gulyas, tha sot se edhe pse Hungaria është nënshkruese e Statutit të Romës, traktatit që krijoi ICC-në dhe e ratifikoi atë në 2001, arrestimi i Putinit nuk do të kishte bazë në ligjin hungarez.
“Ne mund t’i referohemi ligjit hungarez dhe bazuar në këtë nuk mund të arrestojmë Presidentin rus, pasi statuti i ICC nuk është shpallur në Hungari,” tha Gulyas. Ai shtoi se qeveria hungareze nuk kishte “formuar ende një qëndrim” në lidhje me urdhër-arrestin e ICC-së për Putinin.
Orban dhe qeveria e tij kanë qenë gjithmonë aleati më i afërt i Kremlinit brenda bllokut evropian. Pasi Putin urdhëroi trupat ruse të pushtonin Ukrainën vitin e kaluar, Orban ishte lideri më ngurrues i Bashkimit Evropian për të vendosur sanksione ndaj Rusisë.
Hungaria është gjithashtu një anëtare e NATO-s dhe ka shprehur kundërshtime ndaj vendeve perëndimore që të dërgojnë armë në Ukrainë. Orban ka paralajmëruar se Evropa po “zhytet” në luftën në Ukrainë dhe ka bërë përpjekje të gjera për të bllokuar anëtarësimin e Ukrainës në NATO. Ajo po zvarrit gjithashtu përpjekjet e Suedisë për t’u bashkuar me NATO-n.
(BalkanWeb)
