Në rajonin jugor të Ukrainës, në Mykolav përcillet një tjetër realitet i zymtë.

Ndërsa ngricat shkrihen dhe temperaturat janë në rritje, trupat e ushtarëve rusë të shpërndarë nëpër zona të ndryshme po kthehen në problem.

Vitaly Kim, guvernatori i rajonit, u bëri thirrje banorëve vendas që të ndihmojnë në mbledhjen e kufomave.

“Ne nuk jemi kafshë, apo jo?” u shpreh ai drejtuar banorëve.

Mykolaiv ishte ndër kryeqytetet e para rajonale që u sulmuan pasi presidenti rus Vladimir Putin nisi pushtimin e Ukrainës më 24 shkurt.

Por beteja për qytetin, një gur themeli në kërkimin e Rusisë drejt perëndimit përgjatë bregut të Detit të Zi në Odesa, është ende i ndezur dhe është e paqartë se për sa kohë forcat ukrainase do të jenë në gjendje të shmangin sulmin.

Një automjet luftarak rus i djegur, i cili identifikohet edhe nga shkronja Z e vendosur në derën e saj, ndodhej në lindje të qytetit të Mykolaiv më 10 mars.

Nga ana tjetër Kim tha se rusët ishin tërhequr dhe kishin lënë trupat e djegur të kolegëve të tyre, pas në fushën e betejës.

Ai i dërgoi CNN fotografi të kufomave të braktisura, duke shkruar: “Ka qindra të tilla, në të gjithë rajonin”.

Guvernatori ka bërë thirrje që trupat të vendosen në frigoriferë dhe të kthehen në Rusi për identifikim përmes testit të ADN-së.

Por, një muaj pas luftës, është ende e paqartë se si apo nëse eshtrat e ushtarëve po riatdhesohen në Rusi, ku raportet për numrin e të vdekurve janë në heshtje.

Rusia ka goditur çdo informacion në lidhje me realitetet e luftës së përgjakshme, duke kufizuar aksesin në raportet e mediave perëndimore, si dhe rrjetet sociale Tëitter dhe Facebook, në territorin rus.

Po ashtu edhe presidenti ukrainas Volodymyr Zelensky ka thënë se numri i trupave ruse të vrarë në Ukrainë mbetet një mister.

Zyrtarët ukrainas kanë pohuar se numri është më i lartë nga sa raportohet nga Rusia, në më shumë se 15,000.

CNN nuk ka qenë në gjendje të verifikojë numrin e përgjithshëm të vdekjeve ruse.

Një nga imazhet më të zjarrta dhe të hershme të luftës në Ukrainë ishte e një ushtari rus të vdekur, me fytyrën dhe trupin e tij të errësuar nga pluhuri i borës së re.

Fotoja, e shkrepur nga fotoreporteri i Neë York Times, Tyler Hicks, kapi anonimitetin e më shumë se 150,000 rusëve të dërguar për të luftuar fqinjët e tyre  dhe ankthin e familjeve ruse të dëshpëruara për të mësuar ndonjë informacion për fatin e tyre.

Po ashtu një tjetër foto tregon se bora mbulon trupin e një ushtari rus të vdekur pranë një autostrade jashtë Kharkiv, Ukrainë, një ditë pas fillimit të pushtimit.

Qeveria ukrainase ka pohuar se ushtria ruse dërgoi krematoriume të lëvizshëm për të djegur të vdekurit e tyre.

“Populli rus po vdes këtu, askush nuk i merr njerëzit që vdesin në këtë luftë. A e dini se ata kanë sjellë një dhomë djegieje me vete? Ata nuk do t’ua tregojnë kufomat familjeve të tyre. Ata nuk do t’ua tregojnë nënave që fëmijët e tyre vdiqën këtu, “u tha presidenti ukrainas Volodymyr Zelensky gazetarëve në një konferencë e cila u mbajt më 3 mars.

Ndërkohë Qeveria e Ukrainës tha se është ende në pritje për të marrë një kërkesë nga autoritetet ruse për riatdhesimin e trupave të të vrarëve.

Zëvendëskryeministri ukrainas tha se çështja e mbledhjes dhe identifikimit të trupave ishte diskutuar në një takim midis kryeministrit Denys Shmyhal dhe presidentit të Komitetit Ndërkombëtar të Kryqit të Kuq, Peter Maurer, të enjten.

Por KNKK nuk ka konfirmuar nëse po ndihmon Ukrainën në kthimin e mbetjeve ruse në vendin e tyre, gjë që parashikohet nga ligji ndërkombëtar.

(BalkanWeb)