Një valë nxehtësie do të godasë Spanjën dhe Portugalinë, e cila pritet të zgjasë të paktën deri të hënën e ardhshme.
Menjëherë autoritete kanë paralajmëruar mbi rrezikun e mundshëm të vatrave të zjarreve që do të shpërthejnë në Gadishullit Iberik.
Në Spanjë , rreziku i zjarreve u konsiderua “ekstrem” në pjesën më të madhe të vendit për sot dhe nesër të premten, sipas Shërbimit Meteorologjik Kombëtar, i cili ende nuk ka publikuar parashikimet e tij për ditët në vijim.
Në Portugali , rreziku i zjarrit është “maksimal” midis të enjtes dhe të hënës në veri dhe qendër të vendit. Rreziku i lartë i zjarreve është shkaktuar nga vala e nxehtësisë që po godet zonën. Në shumë zona temperatura pritet të rritet në nivele shumë më të larta , ku termometrat do të arrijnë deri në 45 gradë Celsius. Nga ana e tij, rajoni i Katalonjës ka ndaluar kampe pyjore dhe sporte në natyrë, si dhe disa punë bujqësore në periudha të caktuara të ditës, për të zvogëluar rrezikun e zjarrit.
Për herë të parë që nga viti 1920, Parku i famshëm Retiro, i preferuar nga madrilenasit që kërkojnë një hije të vogël, pritet të regjistrojë temperatura mbi 40 gradë Celsius për tre ditë rresht, nga nesër deri të dielën, tha zëdhënësi i AEMET Ruben del Kambo.
Këto temperatura, në nivele shumë më të larta se normale për sezonin , janë për shkak të pushtimit të një mase të ajrit shumë të nxehtë nga Afrika e Veriut, shpjegojnë dy shërbimet meteorologjike. Midis 2011 dhe 2020, Spanja regjistroi dy herë më shumë valë të nxehtësisë sesa gjatë secilës prej tre dekadave të mëparshme.
Shkencëtarët i konsiderojnë valët e përsëritura të nxehtësisë si një efekt të padiskutueshëm të ngrohjes globale dhe vlerësojnë se këto valë të nxehtësisë pritet të shumohen, të kenë një kohëzgjatje dhe intensitet më të gjatë.
(BalkanWeb)
