Udhëheqësi suprem i Iranit, Ayatollah Ali Khamenei, ka fajësuar Shtetet e Bashkuara dhe Izraelin për protestat që kanë kapluar vendin për më shumë se dy javë, duke akuzuar vendet se po përpiqen të ndalojnë “progresin” e Iranit.
Khamenei të hënën i cilësoi protestat antiqeveritare që janë ndër më të mëdhatë që vendi ka parë në vite, si “trazira”.
Udhëheqësi 83-vjeçar kishte qëndruar i heshtur ndaj protestave, të cilat shpërthyen pasi një grua kurde 22-vjeçare, Mahsa Amini, vdiq muajin e kaluar në paraburgimin e policisë morale të Iranit.
“Unë them se këto trazira dhe kjo pasiguri ishin një dizajn i SHBA-së dhe regjimit të rremë sionist okupues [Izraelit] dhe atyre që paguhen prej tyre”, u tha Khamenei kadetëve të diplomuar në një akademi policie në Teheran.
“Në aksidentin që ndodhi, një grua e re ndërroi jetë, e cila gjithashtu na dhembi, por reagimet për vdekjen e saj para se të bëhen hetime, kur disa vijnë për të bërë rrugët të pasigurta, djegin Kuranin, heqin hixhabet nga gratë e mbuluara dhe djegin xhamitë dhe makinat e njerëzve, ato nuk janë një reagim normal dhe i natyrshëm”, tha Khamenei ndërsa ishte i rrethuar nga shefat e policisë, ushtrisë dhe Korpusit të Gardës Revolucionare Islamike.
Khamenei u përpoq të nxiste më tej trazirat si pjesë e një përpjekjeje të huaj për të destabilizuar Iranin, duke thënë se një “arsyetim” tjetër do të ishte gjetur për të destabilizuar vendin nëse nuk do të ishte vdekja e Amini.
Udhëheqësi suprem i Iranit argumentoi se trazirat ishin një përpjekje për të ndaluar vendin nga përparimet që ai tha se kishte bërë pavarësisht sanksioneve të ashpra të SHBA-së të vendosura që nga viti 2018 kur Uashingtoni braktisi në mënyrë të njëanshme marrëveshjen bërthamore të Iranit me fuqitë botërore të vitit 2015.
(BalkanWeb)
