Coolio, reperi i viteve ’90 që ndezi listat muzikore me hite si “Gangsta’s Paradise” dhe “Fantastic Voyage”, ka vdekur, tha për CNN miku dhe menaxheri i tij Jarez Posey. Ai ishte 59 vjeç.

Posey tha se Coolio vdiq në orët e pasdites sipas kohës lokale në Los Angles të mërkurën. Detaje mbi rrethanat e vdekjes nuk janë bërë ende publike.

Kur u kontaktua nga CNN, kapiteni Erik Scott i Departamentit të Zjarrfikësve të Los Anxhelosit konfirmoi se zjarrfikësit dhe mjekët ndihmës iu përgjigjën një telefonate në bllokun 2900 të South Chesapeake Ave, në orën 4 pasdite, ora lokale, duke raportuar një urgjence mjekësore. Kur mbërritën, gjetën një mashkull që nuk reagonte dhe kryen “përpjekje ringjalljeje për rreth 45 minuta”. Pacienti “u përcaktua i vdekur pak para orës 17:00”, tha Scott.

“Jemi të pikëlluar nga humbja e mikut dhe klientit tonë të dashur, Coolio, i cili ndërroi jetë këtë pasdite”, tha në deklaratën e dhënë për CNN menaxherja e talenteve të Coolio, Sheila Finegan.


“Ai preku botën me dhuntinë e talentit të tij dhe do t’i mungojë shumë të gjithëve. Faleminderit të gjithëve në mbarë botën që e kanë dëgjuar muzikën e tij dhe të gjithëve që kanë ndihmuar në lidhje me vdekjen e tij”

Coolio u rrit në Compton, Kaliforni, sipas një biografie në faqen e tij zyrtare.

Duke folur për Los Angeles Times në 1994, ai kujtoi se ra në skenën e drogës, por u largua duke ndjekur një karrierë si zjarrfikës.

“Nuk po kërkoja një karrierë, po kërkoja një mënyrë për t’u pastruar – një mënyrë për t’i shpëtuar drogës,” i tha ai gazetës. “Do të më vriste dhe e dija se duhej të ndaloja. Në trajnimin e zjarrfikësve më duhej disiplina. Ne vraponim çdo ditë. Nuk pija duhan ose nuk bëja gjërat që bëja zakonisht.”

Karriera e tij si reper filloi në vitet ’80 dhe ai fitoi famë në skenën e underground.

“Fantastic Voyage” ishte kënga e parë që vërtet e vendosi atë në listën e më të famshmëve.

Ndoshta kënga e tij më e madhe, “Gangsta’s Paradise”, nga kolona zanore deri te filmi “Dangerous Minds”, e rriti fuqinë e tij si yll në përmasa gjigante. Ai fitoi një Grammy në vitin 1996 për këngën.

Në korrik 2022, kënga arriti një moment historik prej një miliard shikimesh në YouTube.

“Është një nga ato lloje këngësh që i kapërcen brezat,” tha ai në një intervistë të fundit. “Unë nuk përdora asnjë fjalë të modës … mendoj se e bëri atë të përjetshëm.”

Gjatë karrierës së tij, Coolio shiti më shumë se 17 milionë disqe, sipas faqes së tij të internetit.

Coolio ka gjithashtu një vend të veçantë në zemrat e disa Millennials për punën e tij në këngën me temë për serialin e njohur televiziv Nickelodeon “Kenan and Kel” dhe kontributin e tij në albumin “Dexter’s Laboratory: The Hip-Hop Experiment”, i cili përmbante këngë nga artistë të ndryshëm hip-hop që u frymëzuan nga seriali i animuar Cartoon Network.

Vitet e fundit, Coolio gëzonte përfitimet e të qenit një figurë nostalgjike, duke bërë shfaqje televizive në evente si “Celebrity Cook Off” dhe “Celebrity Chopped”.

Ai gjithashtu kishte një shfaqje në Oxygen, “Coolio’s Rules”, që u transmetua në vitin 2008.

(Cnn/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: