Nga Cërriku, kryeministri Edi Rama tregoi se mandati i dytë qeverisës, ka kaluar përmes shumë peripecish të shkaktuara nga tërmetet dhe pandemia. Ai tha se Shqipëria më në fund, po fiton betejën me këto dy të këqija që kanosën vendin, e shumë shpejt, mijëra familje do të vendosen në shtëpi të reja e mijëra persona po shohin dritë në fund të tunelit nga kjo pandemi.
Ai tha ndër të tjera, se bujqësia dhe infrastruktura janë një projekt i qeverisë, e theksoi se në mandatin e tretë, prioritet është të shkohet në 1 miliardë eksporte bujqësore. Sakaq, Rama tha se ka ulur taksën dhe TVSH për biznesin e vogël, e shtoi se një gjë e tillë nuk do të ndodhë për sipërmarrjet e mëdha që sipas tij, do vijojnë ta kenë taksën ende 15%.
“Mbi partitë është shëndeti i popullit, i gjithkujt që kërcënohet nga armiku i padukshëm, për shkak të sëmundjeve kronike, për shkak i të ndodhurit në një mjedis ku infektohesh. Ne e kemi të pamundur që të harrojmë se shëndeti është mbi të gjitha dhe e kemi të pamundur ta ndajmë luftën e përditshme, të përnatshme, luftën që kemi nisur prej një viti me këtë armik të padukshëm, për ta vënë qëllimin e kësaj lufte mbi çdo qëllim tjetër, për këtë arsye i shohim me keqardhje, frikë, ato grumbullime të çartura, me flamuj, makina, gjoja spontane. Sepse kemi parë se çfarë ka ndodhur në vendet fqinje, për shkak të fushatave. Numri i të plagosurve është rritur, ne nuk duam që asnjë shqiptar i vetëm të humbasë jetën për shkak të zgjedhjeve, të plagosen për shkak të zgjedhjeve. Duam ta respektojmë deri në fund këtë detyrim për ë shkuar në ditën e gjykimit të popullit me votë.
Nga ana tjetër, ne duam të fitojmë luftën me armikun e padukshëm, është një luftë që po e fitojmë çdo ditë. Shqipëria si pak kush tjetër e ka filluar vaksinimin masiv dhe po i kthen buzëqeshjen mijëra gjyshërve dhe gjyshërve. Duhet të bashkohemi edhe më shumë me njëri-tjetrin. Vetëm ne, pavarësisht të metave tona e dimë shumë mirë jo vetëm se kur duhet të shkojmë, por si shkojmë aty kur duam. Të tjetër nuk kanë dhënë provë tjetër, veçse e kanë kthyer mbrapsht, Shqipërinë dhe cdo punë që kanë marrë përsipër të bëjnë. më 25 prill testohet karakteri ynë si shoqëri, përballë sfidave që kemi. Kthimi i mijërave familjeve që do të rikthehen në shtëpi më të mira e të bukura, sfidën e jashtëzakonshme të daljes nga tuneli i pandemisë, por edhe sfidat e tjera për ta çuar përpara ekonominë, drejtësinë, e turizmin, duke rritur punësimin e vende të reja pune të mirëpaguara. Do e kthejmë Shqipërinë në një vend që jo vetëm e prodhon energjinë këtu, por edhe e eksporton, kjo s’është një ëndërr në gjumë, është një mundësi reale me investime të reja që janë në proces në bashkëpunim me SHBA, me HEC-in dhe Skavicën. Shqipëria do të bëhet vendi që eksporton energji dhe nuk shpenzon asnjë qindarkë për energji. Po kështu, me bujqësinë, ne duam dhe duhet ta bëjmë Shqipërinë kampione të eksporteve bujqësore të rajonit tonë.
Në katër vitet e ardhshme parashikojmë të shkojmë në 1 mld eksporte. Ne kemi një nga kampionët e punës me tokën, në Elbasan, kemi një nga ata shembujt frymëzues që tregojnë se puna të nxjerr atje kur do, nëse ti nuk dorëzohesh. Patjetër që ka arsye për të qenë të pakënaqur, të mërzitur, të gjitha janë të kuptueshme, por ka vetëm një mënyrë për të bërë më shumë, vetëm të mos dorëzohesh dhe të vazhdosh të ngjitesh. Të mos kthehesh mbrapa, karakteri ynë, i qeverisjes tonë, është i atyre fermerëve që shkojnë dhe para se ta mbledhin përballen me breshrin, por ata nuk dorëzohen, por të nesërmen prapë kthehen tek toka fillojnë nga e para dhe ia dalin. Kështu ia dalin, këta jemi ne Partia Socialiste e Shqipërisë. Marrëdhënia jonë është me njerëzit e zakonshëm, pavarësisht se sa shumë herë i kemi lënduar njerëzit, marrëdhënia jonë është me njerëzit, nëse kemi arritur të bëjmë kaq, tregon se kemi qenë të bashkuar me njerëzit.
Ne s’kemi bërë skemë për naftën për taksa, për socialistët dhe as e kemi shpërndarë naftën pa taksa për të tanët. Ne se kemi bëre 0 TVSH vetëm për socialistët, por për të gjithë shqiptarët. Popullin e shohim si aleatët tanë më të fortë, të kësaj rruge që vazhdon dhe deri në vitin 2029 s’do paguajnë asnjë taksë. Do të mbështeten nga ne. Nga ana tjetër, sigurisht e mbështesim biznesin e madh, por kurrë s’do heqim dorë nga parimi se kush fiton më shumë do të paguajë më shumë. Në çdo fushatë politikanët thonë do të ulim taksën, jo, ne nuk do e ulim taksën për biznesin e madh, do të paguajë 15% dhe të jetë e ndërtuar që e bën këtë për kontribut për njerëzit, për të ndërtuar më shumë spitale, qendra shëndetësore, e shkolla”, tha Rama.
(BalkanWeb)
