Nuk ka zhgënjyer si gjithmonë “Klasikja” mes Boca Juniors dhe River Plate. Spektakël në tribuna dhe “luftë” sportive mes dy rivalëve të përjetshëm të futbollit argjentinas në gjysmëfinalen e kthimit për Kupën Libertadores. Boca fitoi 1-0, por në fund e gjithë festa ishte për River Plate, që siguroi biletën e finales pas suksesit 2-0 në sfidën e vajtjes që lishte luajtur në shtëpinë e tij.
Ashtu siç pritej, ndeshja u karakterizua nga përplasjet e forta në mesin e fushës, ndërsa nuk munguan gjestet teknike dhe rastet për shënim. Gjithsesi, finalizimi la për të dëshiruar dhe pas pjesës së parë të mbyllur pa gola, rezultati mbeti i pandryshuar deri në minutën e 80-të.
Shpresat e të zotëve të shtëpisë u ndezën kur Hurtado shënoi golin e epërsisë. Gjithsesi, Boca Juniors dështoi të përmbyste rezultatin, duke i lejuar rivalëve historikë të kualifikohen në finalen e turnet më të rëndësishëm të futbollit latin për klube. River Plate do të njohë kundërshtarët që do të dalin nga derbi brazilian mes Flamengo dhe Gremio.
(balkanweb)