Gropa misterioze që kanë bërë bulqizakët të flasin e të thurin skenarë të ndryshëm e mistikë. Ka nga ata që thonë se gojëdhënat e ndryshmet kanë shkuar deri në vesh të gjuetarëve të thesareve që në ish-qytezën mesjetare të Getias e cila shtrihej në fshatin e sotëm Valikardhë të Njësisë Administrative Zerqan në Bulqizë, ka flori të fshehur nën tokë.

Kjo pasi prej muajsh kanë nisur gërmimet e fshehta nga persona të paidentifikuar nga banorët e zonës. Kujtojmë se Valikardha ishte vendi i disa betejave të Gjergj Kastriot Skënderbeut kundër turqve.

Sipas Kryetarit të Fshatit Valikardhë, Agron Allushi, gërmimet në këtë zonë kanë nisur që para një viti. Gërmuesit që kanë ardhur me mjete të rënda si dhe sonda shpimi, kanë bërë disa kërkime, të cilat kanë rezultuar të pasuksesshme.

Allushi tregon se dikur në vendin ku janë bërë gërmimet sot ka qenë një Han, e gojëdhënat kanë thënë që duhet të ketë pasur ar, e kjo shihet si një arsye që i ka shtyrë gjuetarët e thesareve të gërmojnë.

Pas ngritjes së problemit nga ana e banorëve, një grup arkeologësh nga Ministrisë së Kulturës ishin në Valikardhë. Jashtë kamera banorët e zonës thanë se janë hapur disa gropa me thellësi të madhe e janë bërë gërmime në sipërfaqe. Të gjitha këto punime, sipas tyre janë kryer natën, jashtë vëmendjes së të gjithëve. Po ashtu mësohet se policia lokale e Bulqizës ka nisur hetimet për rastin në fjalë.

Pikërisht këtu në këtë vend strategjik Skënderbeu ka zhvilluar betejën e qershorit të vitit 1444 ku turqit pësuan humbje të mëdha. Kjo është beteja e parë pas Besëlidhjes së Lezhës. Ushtria shqiptare komandohej nga Gjergj Kastrioti, Skënderbeu, ndërsa ushtria osmane komandohej nga gjenerali turk Ali Pasha.

(m.k/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb