TIRANE- Që seanca e sotme parlamentare u nxeh tej mase kjo u vu re nga të gjithë, mjafton të shihje lëvizjet dhe të dëgjoje deklaratat e tyre, fill pasi ish-ministri i Brendshëm Flamur Noka dha lajmin e rrëzimit të një avioni tip “Piper” në grykëderdhjen e Ishmit. Për të vulosur ditën debatet u përqendruan edhe tek zgjedhjet e Dibrës, për të cilat hodhën e pritën akuza të djathtë e të majtë.
Si të mos mjaftonte, në sallë është vërejtur edhe një moment tensioni mes ishministrit të Brendshëm, Flamur Noka dhe deputetit të PSsë, Sadri Abazi.
Ky moment mund t’i ketë shpëtuar syrit tuaj por jo kamerave në sallë që kanë arritur të fiksojnë momentin kur, Flamur Noka tenton të godasë kundërshtarin e tij politik, pikërisht në momentin që në foltore mbante fjalën kryeministri Rama.
Për të shmangur ndonjë përleshje të mundshme mes tyre ka ndërhyrë deputeti i PD-së, Florion Mima. Ajo që solli reagimin e ashpër të Nokës ishte fakti se Abazi qeshte vazhdimisht me të madhe sa herë fliste deputeti i PD-së.
(ma.ar/BalkanWeb)