Ky është momenti kur Klement Balili takohet me njerëzit në Delvinë para se të dorëzohej në polici. Si një njeri i zakonshëm, i shoqëruar nga nipi i tij por dhe nga njerëz të shumtë, miq e të afërm, Balili shihet pranë mjetit teksa përshëndetet me njerëzit sikur po shkon në një udhëtim jashtë vendit.
Janë të shumtë qytetarët që kanë dalë për ta shoqëruar. Ndërkohë që shihet se një prej personave pranë tij fut në bagazhin e makinës një çantë ngjyrë ushtarake.
Videon e ka publikuar ish-kryeministri Sali Berisha në faqen e tij në “Facebook”, ku shkruan: “Ediskobari duke u ndarë me qytetarët e vetë!”.
Klement Balili u dorëzua sot në polici pasi i kishte vendosur dy kushte. Drejtori i Policisë së Shtetit Ardi Veliu tha se kusht i parë i Balilit ishte që mos të keqtrajtohej nga punonjësit e policisë si dhe fakti që të deklarohej vetëdorëzimi. Mes të tjerash Veliu tha se pas konktakteve me familjarët e Balilit, kjo gjë u arrit vetëm pas 3 muajsh negociata.
Balili u vetëdorëzua në orën 8:45 te kthesa e Shijanit, mes Delvinës dhe Finiqit, ndërsa ishte i shoqëruar nga nipi i tij Rigers Balili. Pasi u mor në pyetje në ambientet e komisariatit nr.6, ku u bë edhe ekzekutimi i urdhrit të arrestimit, ai iu drejtua Policisë së Tiranës, ndërsa u transportua me makinë policie.
(m.k/BalkanWeb)
