DURRËS
Policia e Durrësit ka vënë në pranga sot një person të shpallur në kërkim dhe që rezulton i dënuar në mungesë me 35 vite burg. Ai është Skënder Baku, 53 vjeç, banues në Luz të Fushë Krujës.
Policia e Shtetit ka publikuar edhe momentin e arrestimit, ku shtetasi Skënder Baku shfaqet i veshur vetëm me pantallona. Skënder Baku akuzohet se për qëllime gjakmarrje, ka marrë pjesë në vrasjen e shtetasit Lulëzim Shera, ngjarje kjo e ndodhur në shtator të 2013 në rrugën kombëtare Fushë Krujë-Laç.
Nga hetimet e kryer rezulton se në vitin 1992, viktima Shera, në atë kohë i dënuar për veprën penale të “shkaktimit të vetëvrasjes”, pas një konflikti në burgun 313 në Tiranë ka vrarë me sende të forta vëllai e Skënderit, shtetasin Arjan Baku.
Njoftimi i policisë:
Finalizohet operacioni policor i koduar “Revenge”. Kapet një person i shpallur në kërkim për vrasje, i dënuar me 35 vite burg.
Në vijim të punën për kapjen e personave në kërkim, Strukturat e Drejtorisë Vendore të Policisë Durrës, në bazë të informacioneve të marra në rrugë operative për vendndodhjen e një personi të dënuar për vrasje, kanë zhvilluar dhe finalizuar me sukses operacionin policor të koduar “Revenge”, si rezultat i të cilit u bë e mundur kapja dhe ndalimi i shtetasit në kërkim:
– Skënder Baku, 53 vjeç, banues në Luz, Fushë Krujë .
Kapja dhe ndalimi i tij u bë pasi Gjykata për Krimet e Rënda,Tiranë, më datë 28.09.2015, e ka dënuar me 35 vjet burg, për veprat penale “Vrasje për gjakmarrje, kryer në bashkëpunim “dhe “Prodhimi dhe mbajtja pa leje e armëve luftarake dhe municionit”.
Ky shtetas më datë 01.09.2013 në qytetin e Fushë Krujës ka vrarë me armë zjarri shtetasin L.Sh. Materialet i kaluan Prokurorisë për veprime të mëtejshme.