Ministri i Turizmit dhe Mjedisit Blendi Klosi i ftuar në emisionin “Real Story” në “News 24” u shpreh se viti 2020 do të kishte boom turistik, në rast se nuk do të ishte koronavirusi.

Klosi tha se hapja e ngadaltë ndihmon turizmin, kurse shtoi se uron në rikuperimin sa më të shpejtë të të gjithë situatës.

“Ne bëmë që të gjithë ata që vijnë në Shqipëri nga jashtë të karantinohen vetë në banesa për 14 ditë. Jemi në fazën ku po mendojmë që të kemi një lehtësim të karantinimit. Të gjitha këto i vendos mjekësia. Është një grup ekspertësh që vendos nëse duhen hapur kufijtë tokësor apo ajror apo jo.

Përpara se të shkojmë këtu, jemi në fazën e parë të hapjes. Në bazë të statistikave do të marrim vendim e ne duam që të marrim masa lehtësuese. Hapja është e bazuar në detaje. Ne vazhdojmë të jemi në aleancë me sektorin e turizmit. Nëse nuk do ishte koronavirusi, 2020 do të ishte vit i sukseshëm shumë për ne. Të jemi me këmbë në tokë e të ruajmë sektorin edhe për vitin tjetër”, tha Klosi.

(d.xh/ Balkanweb)