TIRANË- Ministrja e Mbrojtjes Olta Xhaçka ka deklaruar se buxheti i mbrojtjes do të rritet me 400 mln lekë të reja. Gjatë një vizite dy ditë më parë në Bazën Ajrore të Farkës, Xhaçka foli për pronat e ushtrisë si dhe blerjen e radarëve të rinj ajrorë.

Po ashtu ajo tha se do të ngrihet një grup pune me ministrin e Brendshëm Fatmir Xhafaj për vëzhgimin e hapësirës detare.

Përmes aktit normativ, të miratuar pak javë më parë, Qeveria dha mbështetjen e saj për Forcat e Armatosura. Janë katërqind milionë lekë të reja, të cilat, sipas Ministres Xhaçka do të përdoren për modernizimin e Forcave të Armatosura.

“Do të përmirësojmë ndjeshëm çdo njësi e tregues për t’i shërbyer qytetarëve të këtij vendi. Si qeveri e qytetarëve, duhet të ngremë në maksimum vëmendjen dhe kontrollin ndaj çdo fenomeni apo situate. Përmes kësaj rritje në buxhet kemi siguruar fondet e nevojshme për blerjen e sistemit radar ajror, investimi i parë për ruajtjen e qiejve shqiptarë në demokraci. Së bashku me Ministrin e Brendshëm, kolegun Fatmir Xhafa kemi ngritur një grup të përbashkët inspektimi për të inspektuar në detaje situatën aktuale me vëzhgimin e hapësirës detare. Do të nxjerrim konkluzionet e nevojshme dhe përgjegjësitë e rastit”, tha ndër të tjera Ministrja Xhaçka.

Ministria e Mbrojtjes ka nisur evidentimin e pronave që aktualisht nuk janë vend-dislokime ushtarake. Ministrja Olta Xhaçka gjatë vizitës në Bazën Ajrore të Farkës, ku u takua me drejtues të Forcës Ajrore Shqiptare bëri me dije se ka nisur puna për kontrollin e isha pronave, të cilat administrohen nga Forcat e Armatosura.

“Ministria e Mbrojtjes ka nisur një kontroll të imtësishëm nëpër të gjitha ish-pronat të cilat ka nën administrim. Çdo repart e komandë është ngarkuar që me të gjitha burimet njerëzore në dispozicion, të evidentojë saktësisht statusin aktual pikërisht të atyre pronave që aktualisht nuk janë vend-dislokime ushtarake. Ky kontroll po ndërmerret edhe një herë në zbatim të Vendimit 248 të Këshillit të Ministrave datë 29 Mars 2017, për parandalimin e mundësive për ushtrim aktivitetesh të paligjshme nëpër këto prona. Ky kontroll zhvillohet gjatë kësaj jave dhe do të përfshijë përmes një plani të saktë çdo pronë ish-ushtarake kudo që të jetë ajo. Vëmendja e qeverisë është maksimale dhe çdo veprimtari e jashtëligjshme do të marrë përgjigjen ligjore”, deklaroi Ministrja.

Baza ajrore e Farkës mban peshën kryesore të operacioneve të kërkim – shpëtimit dhe të situatave të emergjencës në vendin tonë. Gjatë vizitës në këtë bazë, Ministrja Xhaçka ndoqi një ditë pune të ekipeve të pilotëve e teknikëve, duke u njohur me problematikat por edhe sfidat për të ardhmen, ku objektivi kryesor është kontributi me kapacitet në ndihmë të komunitetit dhe në operacionet e NATO-s.

Këto deklarata të ministres së Mbrojtjes vijnë kulmin e debateve për trafikun e lëndëve narkotike nga Adriatiku dhe denoncimeve për mosfunksionimin e radarëve për ruajtjen e hapësirës detare.

(m.k/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: