Raporti i analizës vjetore nga agjencia e vlerësimeve financiare Moody’s nuk është asgjë e re për Partinë Demokratike. Deputetja e PD, Jorida Tabaku thotë se sipas këtij raporti nuk ka asgjë për t’u mburrur por më shumë për t’u shqetësuar.
Ajo e vuri theksin tek niveli i borxhit të vendit dhe mungesa e aftësisë konkurruese. Sipas Tabakut raporti kishte më shumë lëvdata për periudhën që PD ishte në pushtet se sa par kohën e qeverisë Rama
Pak më herët gjiganti ndërkombëtar i financave Moody’s e vlerësoi borxhin publik të Shqipërisë si të qëndrueshëm me notën B1 duke deklaruar se pozicioni financiar i vendit është përmirësuar falë disiplinës fiskale. Ndërsa kryeministri Rama e cilësoi vlerësimin e Moody-s si një vlerësim kuptimplotë.
Deklarata e plotë e Jorida Tabakut
“Raporti i radhës i Moody’s – kompanisë së vlerësimit të aftësisë së financiare të vendeve –nuk sjell asnjë gjë të re, madje ai ka më shumë lëvdata për periudhën 2004-2013 se sa për atë të qeverisë Rama. Faktorët që po mbajnë gjallë ekonominë dhe konsumin janë të lidhura ngushtësisht me dy investime të huaja të nisura nga qeveria e shkuar, TAP dhe hidrocentrali Devollit. Janë këto lokomotiva e ekonomisë shqiptare që nxori nga një gati recesion ekonomik vendin gjatë këtij viti, sipas analizës së Moody’s.
Ata që marrin vesh nga ekonomia, kuptojnë që ia nuk ka asgjë për t’u mburrur dhe shumë për t’u shqetësuar, sidomos për nivelin e borxhit të vendit dhe mungesës së aftësisë konkurruese të tij.
Në mënyrë të veçantë raporti, shprehet se Shqipëria ka një nivel të lartë të borxhit publik i cili në vitin 2015 arriti në majën me të lartë në rreth 73 për qind të GDP-së. Moody’s pohon se Shqipëria ka nevoja të mëdha për hua të reja dhe thekson se financimi i qeverisë varet nga paratë e marra hua nga sektori bankar vendas, i cili është i rënduar nga shumë kreditë të këqija, të cilat muajin e fundit janë rritur me 18 mld lekë.
Raporti thekson se niveli i konkurrencës së vendit mbetet i ulët. Në veçanti korrupsioni, qasja në financime dhe rregullat tatimore mbeten dobësi të rëndësishme.
(e.f/ BalkanWeb)
