Granit Xhaka njihet si një ndër futbollistët më të mirë në përbërjen e Zvicrës, por edhe ne radhët e klubit të Arsenal. Së fundi  ai ka treguar detaje për mënyrën se si të dy vëllezërit kanë luajtur me Baselin falë këmbënguljes së babait të tyre.

“Unë jam pranuar në Basel falë vëllait dhe babait tim. Ata donin që të merrnin vetëm atë, por babai u tha: ‘O të dy, o asnjërin’. Ata u detyruan të më merrnin dhe mua”,tha Graniti.

Granit dhe Taulant Xhaka janë vëllezërit shqiptarë që shpesh herë kanë fituar vëmendjen në botë. Nuk do të harrohet përballja mes tyre në Kampionatin Evropian apo edhe përballja me skuadra, Baseli kundër Arsenalit.

Por, në një intervistë për mediat zvicerane, Graniti ka rrëfyer për fëmijërinë në Basel. “Taulanti është më i talentuar se unë. Karakteristika ime kryesore është se jam punëtor i madh. Unë jam pranuar në Basel falë vëllait dhe babait tim. Ata donin që të merrnin vetëm atë, por babai u tha: ‘O të dy, o asnjërin’. Ata u detyruan të më merrnin dhe mua”, ka treguar Graniti, që luan tani në Arsenal, përcjell albinfo.ch.

“Duke qenë se isha gjithmonë ai që konsiderohesha me më pak talent, nuk e mendoja asnjëherë se do të bëhesha profesionist. Një ëndërr e kthyer në realitet. Gjë e mirë që ia dolëm të dy”.

Megjithatë, edhe karriera e vëllait të vogël nuk ishte pa vështirësi. “Në moshën 15 vjeçare kam këputur ligamentin. Ai ishte një moment që më forcoi shumë dhe ndikoi në mentalitetin dhe psikologjinë time”, theksoi ai, që është shpallur edhe kampion i botës me Zvicrën për të rinjtë.

Ai nuk e harron asnjëherë vendlindjen e tij në Zvicër. “Sa herë kam dy ditë pushime, shkoj në Bazel. Takoj familjen time dhe kur luan Baseli shkoj në stadium për të mbështetur Taulantin. Do të rikthehem një ditë, natyrisht nuk e mendoj këtë gjë në moshën 28-vjeçare, por mendoj kur të jem 30 vjeç si Alex Frei. Të fitoj dhe ndonjë titull. Një ëndërr e madhe kur kthehesh dhe natyrisht që pritshmëritë janë më të larta”, është shprehur Granit Xhaka.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb