Presidenti ukrainas Volodymyr Zelensky u ka bërë thirrje partnerëve ndërkombëtarë që të përshpejtojnë zbatimin e vendimeve për furnizimin e Ukrainës me sisteme të mbrojtjes ajrore dhe raketore për mbrojtje kundër terrorit rus.

“Ne duhet të bëjmë gjithçka që është e mundur për ta bërë plotësisht të pamundur që Rusia të shkatërrojë sistemin tonë energjetik me raketa dhe dronë. Ne kemi marrë tashmë një sistem shumë efektiv IRIS-T nga Gjermania. Falënderoj zotin Kancelar për këtë. Ky sistem gjerman nuk mbron vetëm qiejt e Ukrainës. Ai mbron stabilitetin evropian, duke kufizuar terrorin rus, i cili godet si vendin tonë ashtu edhe në të ardhmen vendet tuaja. Por ne kemi nevojë për më shumë sisteme të mbrojtjes ajrore dhe mbrojtjes kundër raketave për të krijuar një mburojë ajrore vërtet të besueshme”, tha Zelensky.

Ai tha se disa vende të BE-së tashmë kanë konfirmuar pjesëmarrjen e tyre në këtë punë dhe u bëri thirrje atyre “të përshpejtojnë zbatimin e vendimeve sa më shumë që të jetë e mundur”.

“Tani po i drejtohem Francës, Italisë dhe partnerëve tanë të tjerë jo vetëm në Evropë, por edhe në Shtetet e Bashkuara të Amerikës. Jo vetëm atyre që prodhojnë sisteme të mbrojtjes ajrore dhe mbrojtjes kundër raketave, por edhe atyre që kanë sistemet e nevojshme. Sa më të mbrojtur të jenë qiejt e Ukrainës, aq më e qëndrueshme do të jetë jeta në të gjithë Evropën. Ne duhet ta sigurojmë atë”, tha Zelensky.

Ai tha se ka një përshkallëzim të ri në terrorin rus dhe kjo kërkon që të ndërmerren hapa të rinj si përgjigje – “hapa të shpejtë në solidaritet, hapa që do të mbrojnë si ukrainasit ashtu edhe të gjithë evropianët”.

Zelensky vuri në dukje se objektet evropiane të magazinimit të gazit janë plot, por, për fat të keq, sfida shumë serioze e krizës së çmimeve, të cilën Rusia ndezi dhe nxit për të provokuar tension social në vendet evropiane, mbetet ende. Sipas tij, ky është presioni i llogaritur i Rusisë mbi buxhetin familjar të çdo familjeje evropiane.

Përveç kësaj, Zelensky kujtoi se sulmet nga raketat ruse dhe dronët luftarakë iranianë kanë shkatërruar më shumë se një të tretën e infrastrukturës energjetike të Ukrainës, duke e bërë kështu vendin të paaftë për të eksportuar energji elektrike në Evropë. Në këtë drejtim, ai tha gjithashtu se Rusia duke bërë këtë po provokon një valë të re migrimi të ukrainasve në BE.

Që nga 10 tetori, Rusia ka kryer sulme masive me raketa dhe dronë kamikaze në infrastrukturën energjetike dhe civile të Ukrainës.